Тоғыз жолдың торабындағы Жаңғызтөбе кентіне орнатылған Кенесары ханның мүсіні көптің көңілінен шықты.
Әрине, сыни пікірлер де айтылды. Дей тұрғанмен, тұғырға қонған Хан Кенені шағын ауылдың төрінен көреміз деп ойламаған едік.
Былтыр Жаңғызтөбе кентіндегі бос тұрған алаңға саябақ салынған. Саябақтың оң жақ қапталы спорттық алаң болса, төр жағына кішігірім сахна қойылған. Елдегі індеттің беті қайтып, қалыпты өмірге оралған соң ауылдағы кейбір мерекелік шаралар, спорттық жарыстар осында өтеді. Ал бақтың төрінде жергілікті қауымдастық мүшелерінің ұсынысымен қазақтың соңғы ханы Кенесарының мүсіні менмұндалады. Тақта отырған ханның айбарлы, сұсты мүсіні демеушілердің көмегімен жасалды. Авторы Семейдегі «Толы» ЖШС жетекшісі Мәукен Өтежан екен.
Кенесары Қасымұлы 1837 жылы үш жүздің басын қосып, ұлт-азаттық көтерілісін жасағаны тарихтан аян. Ол бала кезінен-ақ ат құлағында ойнады, құралайды көзге атқан мерген болды. Қара қылды қақ жарған әділдігімен, жүрек жұтқан батылдығымен, қайсарлығымен тaнылды. Тарихтағы деректерге сүйенсек, Хан Кене орта бойлы, төртпақ тұлғалы адам болған екен. Аз сөйлеп, көп тыңдапты. Өзін өзі аса байсалды ұстаған деседі. Рас, қазақтың азаттығы үшін күрескен батыр бабамыздың атына көше беріп, ескерткішін қойып жатсақ артықтық етпейді. Керісінше, өсіп келе жатқан ұрпақ үшін тәрбие емес пе?!