Әрқайсымыздың бала қиялымызда аспан әлеміне саяхат жасап, ғарышқа жеткіміз келсе де, іс жүзінде ғарышкер атану санаулы адамның ғана қолынан келген. Дегенмен бүгінде бұл тылсым әлемге бір елі жақындауға керемет мүмкіндігіміз бар. Неге десеңіз, ғарышқа апарар төте жол қазақтың дарқан даласынан бастау алады, ал Байқоңыр сол жолдың «қақпасы» іспеттес. Бай тарихқа ие «Байқоңыр» ғарыш айлағы – аспан әлемімен жақындастыратын Жер шарындағы саусақпен санарлық нүктенің бірі. Қазір футурологтер жеке ғарыш айлақтары құрылып, ғарыштық туризм белсенді дамиды деген болжам айтады.
Қазақстанмен көршілес Ресей арасындағы стратегиялық әріптестік пен ынтымақтастықтың нәтижесінде «Байқоңыр» ғарыш айлағын сақтап, жарты ғасырдан аса уақыт оның инфрақұрылымын тиімді пайдаланып келеміз. Сондай-ақ бүгінде «Байқоңырды» ғарыш саласының ғана емес, туризм индустриясының әлемдік брендіне айналдыруға толық мүмкіндік бар.
Әлемдік тәжірибе ғарыш туризмін дамытудың тартымдылығы мен экономика жағынан тиімділігін көрсетеді. Қазірдің өзінде инфрақұрылымы дамыған, қолжетімді баға ұсынатын осындай ғарыш орталықтары жылына 1,5 миллион туристі қабылдап, 270 млн АҚШ долларына дейін табыс табады. Аталған кешендегі инфрақұрылымы дамыған ойын-сауық орталықтары, түрлі шоу-бағдарлама, экскурсиялар осындай нәтижеге қол жеткізуге мүмкіндік берді.
Kazakh Tourism ұлттық компаниясының Басқарма төрағасы Ержан Еркінбаевтың айтуынша, әлемде ғарыш туризміне сұраныс жыл сайын кем дегенде 9%-ға өсіп келе жатыр.
– «Байқоңыр» ғарыш айлағында туризмді дамытуды біз сұранысқа ие салалық бағыттардың бірі ретінде қарастырамыз. Зерттеулерге сүйенсек, бүкіл әлем бойынша 280 миллионға жуық турист салалық туризмнің түрлі бағытын таңдайды. Оның ішінде әлем халқының 9 пайызы жыл сайын ғарыштық туризмді таңдайды. «Байқоңырдың» адам еркі мен ақыл-ойының дәрежесін көрсететін деңгейін әлі кең көлемде көрсете алмай келеміз. Осы олқылықтың орнын толтыру мақсатында Мәдениет және спорт министрлігі мен Kazakh Tourism бірлесіп маркетинг, бейнеконтентті ілгерілету және одан әрі даму мәселелерін пысықтау бойынша белсенді жұмыс істеп жатыр.
Осы ретте «Байқоңырды» қолжетімді саяхат орнына айналдыру үшін бірінші кезекте ғарыш айлағына кіру мәселесін шешу қажет.
Жақында Премьер-Министр Асқар Мамин бастаған қазақстандық тарап ресейлік әріптестерімен кездесу барысында қала мен ғарыш айлағының аумағына бақылау-өткізу режімін жеңілдетуді ұсынды. Сонымен қатар ең заманауи стандарттарға сай жабдықталған және тұрақты рейстерді қабылдауға дайын «Крайний» әуежайын пайдалану жайын ұсынды. Ал ұзақмерзімді перспективада «Байқоңыр» аумағына визасыз режім енгізу шетелдік туристерді тартудың тиімді шарасы болуы мүмкін.
Кездесу аясында іске асыруға дайын жобалардың идеялары айтылды. «Ғарыш айлағында темір жол желісі дамыған кешен аумағында туристік пойызды іске қосу арқылы балалар мен жасөспірімдер туризмін дамытуға алғышарт жасауға болады. Бұдан бөлек қазірдің өзінде бірқатар қызық жобаны іске қосуға мүмкіндік бар», деді Ержан Еркінбаев.
Жуырда ғарыш айлағының аумағына келген туристер үш күн немесе одан да ұзақ мерзімге тұрақтай алуы үшін тақырыптық саябақ, ғарыштық аттракциондар, қонақүй кешендері және демалыс орындары бар туристік аймақ пайда болмақ.
«Байқоңыр» жақын арада әлемдік ғарыштық туризмнің жаңа нүктесіне айналады деген үміт бар.