Шайбалы хоккейден Қарағандының «Сарыарқасы» ел чемпионатының кезекті тур ойынында Өскеменнің «Торпедосын» өз айдынында қабылдап, ірі есеппен жеңіске жетті.
«Қарағанды-Аренада» өткен кездесуде «кеншілер» командасы қарсыластарының қақпасына жауапсыз бес шайба соқты. Бірінші кезеңнің 30-секундында Михаил Рахмановтың пасынан кейін Степан Гримзин матчтың есебін ашса, 15-минутта Никита Анохин таблодағы көрсеткішті 2:0-ге жеткізді. Бірінші кезеңнің аяқталуына бес секунд қалғанда Михаил Рахманов енді Никита Аноховскийге гол соғатын тамаша мүмкіндік жасап берді – 3:0.
Үзілістен кейін де айдын иелері қарқынын бәсеңдеткен жоқ. 35-минутта былтыр «Барыс» сапында ҚХЛ-да өнер көрсеткен Саян Данияр мергендігімен көзге түссе, үшінші кезеңнің орта тұсында дәл сол С.Данияр дубльдің авторы атанып, ойынның нүктесін қойды. Қорытынды есеп – 5:0.
«Сарыарқа» бұл жеңісінен кейін турнир кестесінде 30 ұпаймен көш бастаған еді. Алайда күні кеше Көкшетаудың «Арланы» сырт айдында «Теміртауды» буллит сериясында 4:3 есебімен жеңіп, «кеншілер» командасын екінші орынға ығыстырды. Ал Өскеменнің «Торпедосы» алтыншы орынға түсіп қалды.