Еуропа құрлығында 2022 жылы Қатарда өтетін әлем чемпионатына жолдама беретін іріктеу матчтары аяқталып, жаһандық додаға тікелей жолдама алған 10 құрама белгілі болды.
16 қарашада аяқталған іріктеудің нәтижесі бойынша өз топтарында бірінші орын алған Германия, Дания, Бельгия, Франция, Хорватия, Испания, Сербия, Англия, Нидерланд және Швейцария құрамалары 2022 жылғы әлем чемпионатында ойнайтын болды. Ал өз тобында екінші орынға табан тіреген Португалия, Швеция, Италия, Украина, Уэльс, Шотландия, Түркия, Ресей, Польша, Солтүстік Македония мен Ұлттар лигасынан Аустрия мен Чехия футболшылары електік ойын өткізіп, қосымша жолдаманы сарапқа салады.
Айта кетейік, бұған дейін Оңтүстік Америка құрлығынан Бразилия мен Аргентина құрамалары Қатарға баратындардың қатарын толықтырған еді. Жарыс қожайындарын қоса есептегенде бүгінге дейін әлем біріншілігіне қатысатын 32 құраманың 13-і белгілі.