Зияткерлік меншік мәселелері бойынша заңнамалық түзетулер ұжымдық ұйымдар қызметінің ашықтығы мен тиімділігін арттырады. Әділет вице-министрі Ақерке Ахметова мәлімдеуінше, депутаттар ұсынған заңдағы өзгерістер ең алдымен ұжымдық ұйымдар қызметінің ашықтығы мен тиімділігін арттыруға бағытталған.
А.Ахметованың айтуынша, бұл түзетулер Парламентте барлық мүдделі тараптар, атап айтқанда, авторлық қоғамдастықтар, патенттік сенім білдірген өкілдер, кәсіпкерлер, халықаралық және ұлттық сарапшылар шақырылатын жұмыс топтары барысында қаралып, талқыланады. Сонымен қатар «географиялық көрсету» өнеркәсіптік меншіктің жаңа объектісін күзетуді енгізу, тіркелмеген өнеркәсіптік үлгілерге қатысты қысқа мерзімді күзетуді ұсыну да қарастырылған. Тауар таңбалары, географиялық көрсеткіштер және тауар шығарылған жердің атаулары бойынша «оппозициялық» жүйені енгізу, патенттік сенім білдірілген өкілдердің қызметін реттеу бойынша да мәселелер талқыға салынып отыр. «Түзетулер кезінде құқықтардың ұжымдық басқару саласында авторлардың немесе құқық иеленушілердің құқықтарын көлемі, аумағы және басқару салалары бойынша шектеуі бар бір ғана ұйымға немесе бірнеше ұйымға беру, сонымен қатар пайдаланушылармен жасалатын шарттар және аудиторлық қорытындылар туралы толық ақпаратты интернет ресурста орналастыру жөніндегі міндеттер қарастырылады. Сондай-ақ ұйымның нақты шығыстарын жабуға және арнайы қорларына жіберілетін қаржы көлемдерін нақтылау көзделіп отыр», деді заң талаптарын егжей-тегжей түсіндіріп өткен министрлік өкілі.
Вице-министрдің мәлімдеуінше, бұдан былай ұйымдар жиналған сыйақы, ұсталған сомалар туралы есептерін интернет ресурстарындағы жеке кабинеттері арқылы авторларға және құқық иеленушілерге жіберіп отыруға міндетті. Ал Қазақстанның заңнамасына жаңадан енгізіліп отырған «географиялық көрсету» деген ұғым географиялық нұсқауларды тауарлар шығарылған жерлердің атауларынан бөлек тіркеуге мүмкіндік бермек. «Өнеркәсіптік меншік объектілері бойынша Қазақстанның 2 жеке мемлекеттік тізілімі жүргізіледі. Географиялық көрсеткіштерді тауарлар шығарылған жерлердің атауларынан бөлек қорғауды ұсыну отандық өндірушілердің құқықтарын іске асыру мүмкіндіктерін кеңейтіп, Ұлттық брендтеуді дамытуға оң әсер етеді. Тіркелмеген өнеркәсіптік үлгілерге қысқа мерзімді күзет ұсыну құқық иеленушілерді бірегей бұйымдардың сыртқы түрін тікелей көшіруден қорғау мақсатында жүзеге асырылады. Тіркелмеген өнеркәсіптік үлгі алғашқы жарияланғаннан кейін 3 жыл ішінде тіркеу құжатынсыз және қорғау құжатынсыз қорғалады», дейді А.Ахметова.