Биылғы 22-25 мамыр аралығында Астана қаласында халықаралық «KADEX-2014» көрмесі өткізіледі. Оған қатысуға 200-ден аса шетелдік компания өтінім берді. Бұл туралы Қорғаныс министрлігінің баспасөз қызметі хабарлады.
Осыған дейін екі рет өткізілген «KADEX» қару-жарақ және әскери-техникалық мүлік көрмесіне қатысқан шетелдік компаниялар біздің әскери әуелетімізге оң бағасын берген еді. Енді, міне, сол көрме үшінші рет өткізілгелі отыр.
«Алда өткізілгелі отырған көрменің басты ерекшеліктерінің бірі ондағы секцияларға қойылатын экспонаттардың ауқымдылығында. Мұнда ғарыштық технология, авиация мен авиациялық қару-жарақ, әуе шабуылынан қорғану жүйелері мен құралдары, әскери саладағы робот техникасы, ІТ-технология, байланыс жүйесі мен құралдары, әскерлерді тылдық және техникалық қамтамасыз ету, Құрлық әскерлері мен Әскери-теңіз күштерінің қару жарағы мен әскери техникасы қойылмақ», - делінген хабарламада.
Дерекке жүгінсек, қазірден бастап ТМД елдері мен алыс-жақын шетелдердегі 200-ден аса компания қазақстандық көрмеге қатысуға өтінім беріпті.Олардың қатарында қару-жарақ шығаратын белгілі Fabbrica d Armi Pietro Beretta S. p. A., EADS, Israel Aerospace Industries, Otokar, Ceska Zbrojovka, Rohde & Schwarz ,Poly technologies Inc және басқалары бар. Жалпы, көрме өткізілетін алаңның көлемі - 5000 шаршы метр.
«KADEX» қару-жарақ және әскери-техникалық мүлік көрмесі аясында халықаралық әскери-ғылыми-техникалық конференциялар өткізу жоспарланған.
Әмірхан Алмағанбетов.
Дереккөз: Қорғаныс министрлігінің баспасөз қызметі.
Фото: www. Strategy2050. kz.