Қазақстан шахматшылары Македонияның астанасы Скопье қаласында өтіп жатқан «Karpos-open» халықаралық турниріне қатысуда. Бұл туралы Қазақстан шахмат федерациясы хабарлады.
Жарыс 29 наурыз күні басталған. Турнирдің сыйлық қоры - 25 мың еуро. Осы қомақты жүлдені бірінші, екінші және үшінші орын алған шахматшылар бөлісіп алады. Жарысқа барлығы 262 адам қатысуда. Соның ішінде біздің елден үш шахматшы, атап айтқанда, Ринат Жұмабаев, Гүлісхан Нақбаева мен Мәдина Дәулетбаева бақ сынасуда.
Қазақстан шахматшылары турнирдің бірінші кезеңін жеңіспен бастады. Екінші кезең Ринат үшін сәтті өтті. Ал Гүлісхан мен Мадина қарсыластарымен тең түсті. Турнир 5 сәуір күні аяқталады.
Дастан Кенжалин.
Дереккөз: kazchess.kz.
Фото: gambit.com.mk.