Алаңдауға еш негіз жоқ

Ресейдің бейбіт тұрғындары арасында да дүрбелең бар. Ресейден көшуге бет алған халықтың алдымен бет алатын жерінің бірі Қазақстан екені даусыз. Осыған орай әлеуметтік желіде әртүрлі қауесет қаптап кетті. Олардың көбінде біздің елдің аумағына ресейліктердің көптеп енгеніне қарсылықтар айтылады. Оның үстіне қазір Ресей Федерациясы Қазақстан мен Моңғолияға жермен өтетіндер үшін барлық кедергіні алып тастады. Ал басқа мемлекеттерге өту әлі де шектеулі. Алдында Еңбек және халықты әлеуметтік қорғау министрі Ержан Біржанов 30 наурыздағы мәліметке қарағанда Қазақстанда 101 мың ресейлік жүргенін айтқан еді.

Осыған орай біз Солтүстік Қазақ­стан облысы ПД Көші-қон қызметі басқар­масына хабарласып, көшіп келушілер туралы мәлімет алған едік. Мәліметтерге қарағанда, мәселе соншалықты күрделі емес, қалыптағыдан соншалықты ауытқу жоқ.

Солтүстік Қазақстан облысы ПД Көші-қон басқармасының бастығы, подполковник Т.Әбілевтен алынған мәлі­мет биыл жылдың 1 қаңтар мен 30 наурыз аралығында Ресей Федерациясынан Солтүстік Қазақстан облысына 915 ресейлік азаматтың өтке­нін айтады. Ал өткен жылдың сәйкес мер­зімінде бұл сан 984 болған екен. Кел­гендер не мақсатпен кірді деген сауалға мынадай жауап алдық: жұмыс бабымен – 581 адам, отбасымен бірігу үшін – 243 адам, оқу мақсатымен 26 және т.б. келген. Ал тұрақты тұруды мақсат етіп кел­гендер саны – 32. 2021 жылдың сәй­кес мерзімінде бұл сан 39 болған. Әри­не, келу мақсатын жасырып, теріс көрсете­тіндер көп болады. Бірақ қалай десек те, аталған мерзімде кіргендер саны был­тырғыдан көп емес екенін көреміз.

Көші-қон қызметі бізге Еуразиялық экономикалық одаққа қатысушы елдер азаматтарының Қазақстан Респуб­ликасында болуына рұқсат етілген мерзім – 90 күн екенін айтты. Ал бұл мер­зімнен үш күн асқанда ескерту жасалады, бес тәулік болса 10 АЕК көлемінде, ал бес тәуліктен асып он тәулікке жетсе 15 АЕК мөлшерінде айыппұл салы­нады екен. Ал он тәуліктен асса 25 АЕК мөлшерінде айыппұл салынып, әкімшілік жолмен шекарадан күшпен шығарып жіберіледі. 

Көші-қон қызметінің дерегіне қарасақ, Солтүстік Қазақстан облысынан Ресей Федерациясына 1 қаңтар мен 30 наурыз аралығында тұрақты тұру үшін 363 азамат көшкен. Өткен жылдың сәй­кес мерзімінде бұл сан 348 болған еді.

Аталған мерзімде Ресейден келген­дер арасынан Қазақстан Республи­касының азаматтығын алуға 18 адам өтініш жаса­ған. Ал былтыр осы мер­зімде өтініш жасағандар саны 27 болған. Айта кететін жайт, 2021 жылы Солтүстік Қазақстан облы­сынан Ресей Федерациясына тұрақ­ты тұруға бар­лығы 2 110 азамат кет­кен. Ал Ресей­ден Солтүстік Қазақ­стан облысына тұрақ­ты тұруға 329 аза­мат тіркелген. Соны­мен қатар былтыр бар­лығы 110 адам Қа­зақ­­стан Республикасының азамат­тығын алған.

Деректерге қарағанда, «ресейліктер Солтүстік Қазақстанға қаптап келіп жатыр» деген дүрбелеңге еш негіз жоқ. Көшелерде сырттан келіп жатқан бөтен адамдарға кездеспедік. Сондықтан жел сөзге ермей, сабырлы болайық, ағайын.

Солтүстік Қазақстан облысы