Осы уақытқа дейін қадіріне, қасиетіне жете алмай жүрген көрікті жерлерімізді соңғы жылдары шынайы бағалай бастадық. Әлемді коронавирус дей-тұғын дерт жайлағалы, шекараларға шектеу қойылып, өз елімізді аралап кеттік. Сөйтіп, шетелге бергісіз әсем өлкемізді жақын тани түстік. Ішкі туризмді дамыту үшін мемлекет тарапынан да түрлі бағдарламалар қабылданып, Шығыстағы бірнеше туристік нысанға ерекше басымдық берілді.
Шығыс Қазақсанда туризмнің қай саласы болмасын, дамытуға қолайлы өңір. Мемлекет тарапынан көңіл бөлініп отырған орындарға тоқталар болсақ, Катонқарағай ұлттық табиғи паркі және Риддер қаласы мен Глубокое ауданындағы тау шаңғысы кластері. Бұл туралы облыстық кәсіпкерлік және индустриалды-инновациялық даму басқармасы басшысының орынбасары Марат Қабақов айтқан еді. Катонқарағай ауданындағы ұлттық табиғи паркінің аумағында экологиялық және ауылдық туризмді дамытудың мүмкіндігі мол. Еліміздегі ең ірі ұлттық парк болғандықтан шығар, мұнда жалпы ұзындығы 680 шақырым болатын 14 туристік маршрут пен соқпақ бар.
– Ауданда ауылдық туризмді дөңгелету үшін жан-жақты жұмыстар жүргізілуде. Кәсіпкерлер палатасымен бірлесіп, Берел ауылының 24 тұрғынына кәсіпкерлік негіздеріне оқыту жүргізілді. Тіркелген 18 кәсіпкердің 15-і «Еңбек» бағдарламасы бойынша 583 мың теңгеден грант алды. Бір жобаға «БЖК – 2025» бағдарламасы шеңберінде 5 млн теңге үлестірілді, – деп атап өтті Марат Қабақов.
Сонымен қатар «Катонқарағай ауданының тұрақты дамуы» қоғамдық қоры әрбір кәсіпкерге 500 мың теңгеден грант бергені үлкен көмек болды. Ол қаражатқа кәсіпкерлер ағымдық жөндеу жұмыстарын жүргізді, жиһаздарын жаңартты, серуен үшін ат сатып алды. Сөйтіп, маусым айынан бастап алғашқы туристерді қабылдауды бастап кеткен. Соңғы жылдары туристер легі жыл сайын артып келеді.
Осы орайда айта кетерлігі, Үлкен Нарын ауылында туристік-ақпараттық орталық құру жобасы жүзеге асырылып жатыр. Бұл туристік нысан 10 тұрақты жұмыс орнын құра отырып, жергілікті туристік өнімдер туралы ақпарат беру жөніндегі сервистік қызметті атқаратын болады. Яғни ауданға келген турист сол жерден керекті ақпаратын алып қана қоймайды, өзіне қажет қонақ үйіне дейін таңдап алады.
Айтқандай, жыл басынан бері Катонқарағай ауданының Өрел ауылында 150 төсектік орынға арналған «Мұзтау» туристік кешені ашылды. Өскеменде 200 төсектік орынға арналған 3 қонақ үй жұмысын бастайды. Бұқтырма су қоймасындағы демалыс базасының құрылысы да тәмамдалып қалды. Ал Глубокое ауданы мен Риддер қаласындағы тау шаңғы базасы қыстай үздіксіз қызмет көрсетіп келеді.
Шығыс Қазақстан облысы