Көне Тараз топырағында жүргізілген әр жылдардағы қазба жұмыстары кезінде табылған көне жәдігерлер тарихтан тамыр тартып тұрады. Содан да болса керек, облыстық тарихи-өлкетану музейіне келушілердің саны сиреген емес. Тіпті Қарахан мен Айшабибі кесенесін көруге келген туристер де музейге бас сұқпай кетпейді.
Музей қорындағы көне жәдігерлердің бірі – сақ дәуірінен жеткен қола қазан. Деректерге көз жүгіртсек, бұл жәдігер ІV-VІІІ ғасырлардан сыр шертетін көрінеді. Аталған қазанды кезінде тараздық азамат кездейсоқ тауып алған деседі.
«Сақ дәуірінен жеткен қола қазанды 2006 жылдың жаз мезгілінде Тараз қаласының тұрғыны С.Кудрин Ақсу-Жабағылы қорығы маңынан кездейсоқ тауып алып, музей қорына әкеп өткізген. Біздің қордағы еш бөлігі сынбай, бүтін күйінде жеткен ерекше жәдігерлердің санатына жатады. Деректерге сенсек, сақ тайпасының өкілдері құрбандыққа шалған мал етін дәл осындай қазанға салып асатын болған екен. Қазанның сыртқы бөлігінде жарты шар тәрізді өрнектер сақталған. Ол байқап қараған адамға айқын көрінеді», дейді облыстық тарихи-өлкетану музейінің экскурсиялық және көпшілікке қызмет бөлімінің меңгерушісі Жұлдыз Алманқұлова.
Жамбыл облысы