Аз күннен соң есігін айқара ашатын білім ошақтары биылғы оқу жылына дайындықты толықтай аяқтады деуге болады. Осы қатарда Алматы облысының мектептері де бар. Бұйырса, өңірдегі 423 жалпы білім беретін мектеп пен 44 колледжде алғашқы қоңырау соғылмақ.
Облыстағы оқушы саны 330 мыңның үстінде екен. Ал 35 мың бала биыл тұңғыш рет мектеп табалдырығын аттамақ. Дерекке жүгінсек, облыстағы барлық мектеп 100 пайыз компьютерлік техникамен жабдықталған және интернет желісіне қосылған. Сондай-ақ «Күнделік» автоматтандырылған ақпараттық жүйесінің қызметін 396 білім беру ұйымы қолданады. Ал цифрлық білім беру ресурстарына аймақтағы 385 мектеп қосылуға мүмкіндік алса, оның түгелге дерлігі BilimLand жүйесімен және бір мектеп Daryn.online.kz жүйесімен жұмыс істейді.
– Биыл аймақта 35 мың оқуышы мектеп табалдырығын бірінші рет аттағалы отыр. Қазір оқушыларды мектепке дайындау жұмысы қарқын алған. Ол жақын күндері толық аяқталады. Оның ішінде аз қамтылған отбасыдан шыққан 27 765 баланы тегін мектеп формасымен және кеңсе заттарымен қамтамасыз ету жоспарлануда. Бір балаға мектеп формасы мен кеңсе тауарларын 37 500 теңгеге алуға болады. Сондай-ақ «Мектепке жол» акциясы аясында балаларға 736 млн теңге көлемінде көмек көрсетілді. Оқулықтар сатып алу және кітап қорын жаңарту үшін 2,7 млрд теңге қаражат бөлінді, – дейді облыстық білім басқармасы басшысының орынбасары Гүлсара Исағұлова.
Алматы облысы еліміздегі үш ауысымда оқитын мектеп саны жөнінен алдыңғы орында. Қазір аймақтағы 54 білім ошағына бала сыймағандықтан, оқушылар үш ауысымға бөлініп оқуға мәжбүр. Жалпы, өңірде 54 үш ауысымды мектеп бар, Мектеп жетіспеушілігі, әсіресе Алматы қаласы маңындағы аудандарда қатты сезіліп отыр. Мысалға, Іле ауданында – 20, Қарасай ауданында – 12, Жамбыл ауданында – 10, Талғар ауданында – 6, Еңбекшіқазақ ауданында – 5 және Ұйғыр ауданында 1 мектепте орын жетіспеушілігі бар. Жалпы, аймақ бойынша 23,3 мың оқушыға орын саны жеткіліксіз. Сондай-ақ өңірге 467 педагог маман қажет. Оның ішінде Талғар ауданында – 133, Іле ауданында – 89, Еңбекшіқазақ ауданында – 67, Қарасай ауданында – 55, Жамбыл ауданында 40 мұғалімге сұраныс берілген.
– Облыста 21 білім беру нысанының құрылысы жүргізілуде, 20 мектептің он жетісі үш ауысымды мектептер мәселесін шешуге бағытталған. Жыл соңына дейін 13 нысанды пайдалануға беру жоспарланған, оның ішінде Кеген ауданының Жалаңаш ауылындағы мектеп 1 қыркүйекке дейін пайдалануға беріледі. Осы мақсатта бөлінген 39 млрд теңге қаржының 5,2 млрд теңгесі игерілді немесе көрсеткіші 13,3 пайызды құраған. Жаңа оқу жылында 1 300 орындық 2 мектеп, сондай-ақ 250 орындық 2 жекеменшік мектеп қолданысқа беріледі. Қалған он мектеп жыл соңына дейін оқушыларға есігін айқара ашпақ. Мұнан бөлек, 18 білім беру нысанына 8,7 млрд теңгеге күрделі жөндеу жүргізіліп жатыр. Оның үшеуінде жөндеу жұмыстары аяқталды, – дейді облыстық білім басқармасы басшысының орынбасары Гүлсара Исағұлова.
Күрделі жөндеу жұмысы аяқталған білім ошағының бірі – Кеген ауданы, Жалаңаш ауылындағы Ж.Ермегияев атындағы орта мектеп. Қазір 940 балаға арналған мектепте 245 оқушы білім алады екен. Жақында Кеген ауданының әкімі Талғат Байеділов осы білім шаңырағының бос тұрған сынып бөлмелерінің негізінде физика-математика бағытындағы лицей ашуды ұсынған болатын. Бұл ұсыныс облыстан қолдау тапқан, яғни енді ауыл балалары тереңдетілген білім алатын күн алыс емес.
Алматы облысы