Қаракемер қалашығының орны табылды

Мыңжылдықтармен астасып жатқан көне мәдениеттің нышаны Жамбыл ауданына қарасты Құмтиын ауылының маңынан анықталып отыр. Археолог маман­дардың айтуынша, тарихи қалашық екі бөліктен тұрады. Ал ол кездегі мәдениет VII-XII ға­сыр­ларман сабақтасып жатыр. Қала­ны­ уақытында көшпелілер мен дін­ таратушы мемлекеттердің өкіл­дері пана­лаған.

«Бұл маңда уақытында Түрік қағанаттары ғұмыр кешкен. Шаһар Қарлұқ, Түркеш, Қарахан мемлекеттері тұсында пайда болған. Мұнда бірнеше құрылыс кезеңінің табы сайрап жатыр. Қыс­қасы, байырғы қаланың орны тұ­нып тұрған тарих», дейді архео­лог­тер тобының жетекшісі Ералы Ақынбек жағымды жаңа­лықпен бөлісіп.

Деректерге зер салсақ, көне шаһардың орнын 85 жыл бұрын археолог Александр Бернштам анық­таған көрінеді. Алайда сол кезде ешқандай зерттеу жұ­мыс­тары жүргізілмепті. Өткен жыл­дан бері ескі шаһар орнын ақ­та­руға пейіл танытқан Әлкей Мар­ғұлан институтының мамандары аз ғана уақыт бұрын грант жеңіп алып, жұмысты бастапты. Нәтижесінде, үш аптаның кө­ле­мін­де бірнеше бөлменің орнын анық­таған.

Жүргізілген қазба жұмыс­та­ры­ның нәтижесінде көне қала орнынан қыштан жасалған құмыра, шиша, тандыр пешінің орны табылған. Көне жәдігерлерді қол­ға түсірген мамандар ескі ша­һар орнынан әлі талай тарихи жәді­гер­лер шығатынына сенімді.

Қала орнынан табылған түрлі жә­дігерлердің сынықтарына зер­ салған мамандар мұнда уақы­тын­да­ сәулет өнері мықтап дамыған де­ген тұжырымға келіп отыр. Ал табылған жануарлардың ұсақ­ сүйектеріне қарап, қала халқы уақ малдарды ұстағанын байқауға болады.

Қазба жұмыстары барысында табылған темірден жасалған соқа түркілердің егін шаруашылығына епті болғанын айғақтап тұр. Күн­ сайын жаңалыққа тап болып­ жат­қан археологтер қазба жұмыс­та­рын маусым айының аяғында толық­тай аяқтауға ниеттеніп отыр.                               

Жамбыл облысы