Жас ділмарлар додасы

Жас ділмарлар бас қосқан ой бәсекесі жоғары деңгейде өтті. Халқымыздың ғасырлар бойы қалыптасып, бүгінге жет­кен баға жетпес қасиетті қазы­насын қадірлеген зерек жастар қа­зылар алқасын тәнті етті. Қаты­сушыларға шешен сөйлеу, көр­кемдік, жүйелілік, нақтылық, ой ұшқырлығы, тіл тазалығы, дауыс мәнері, сахна мәдениетін сақтау басты талап ретінде қойылды.

Қазылар алқасының ше­шімімен бас жүлде С.Демирел университетінің 1-курс студенті (500 мың) Шыңғыс Ерболұлына бұ­йырды. Ө.Жәнібеков атын­дағы Оңтүстік Қазақстан педа­гогикалық университетінің 1-курс студенті Динара Алтынбекова жүл­делі 1-орын иегері (300 мың) атанды. Қос бірдей 2-орынды (150 мың) Қазақ-Британ тех­­никалық университетінің шә­кірті Талғат Орынқожа мен М.Қо­зыбаев атындағы Солтүстік Қа­зақстан университетінің сту­денті Нұрай Қалиханова олжалады. Өз өнерімен көпшілікті тәнті еткен Қ.Жұбанов атындағы Ақтөбе өңірлік университетінің студенті Айкөркем Байымбетова, М.Оспанов атындағы Батыс Қа­зақстан медицина универси­теті­нің 4-курс студенті Бекжан Нұр­мұханов, Абай атындағы ҚазҰПУ-дың 1-курс студенті Да­­на Тасмұратоваға жүлделі 3-орын (70 мың) берілді. Сондай-ақ 7 қатысушыға 20 мың теңге көле­мінде арнайы жүлде табыс­талды. Байқауға қатарынан екін­ші мәрте демеушілік жасаған «Атамұра» корпорациясының пре­­зиденті, қоғам қайраткері Ра­қымғали Абрарұлы.

«Шешендік сайысты өт­кізудің басты мақсаты – жаңа буын, жас ұрпақты тіл таза­лығын сақтауға, мем­лекеттік тілді мейлінше жетік білуге баулу. Шешендік өнер ар­қы­лы білім­герге сөз өнерінің ерек­шелігі мен жүйелі сөз саптау шарттарын меңгерту, жүйелі сөйлеу дағдысы мен сөйлеу шеберлігін шыңдау көзделіп отыр. Өскелең ұрпақ сөз құндылығын бағалап, тарихи-мәдени және ұлт­тық болмысын таныса, сол арқылы әдеби тіл нормасына сәйкес мем­лекеттік тілді қолданудың жаңа дең­гейі қалыптасса деген тілегіміз бар. Байқауға төрін ұсынып ұйым­­дастырған Абай атындағы ҚазҰПУ басшылығына, «Ұлт­тық тәрбие» орталығына мың алғыс», дейді жоба авторы, журналист Жарқын Сәленұлы.

АЛМАТЫ