Л.Н.Гумилев атындағы Еуразия ұлттық университетінде «Қазақ лирикасы және Марфуға Бектемірова поэзиясы» атты халықаралық ғылыми-тәжірибелік конференция өтті. Белгілі ақын һәм аудармашы, публицист марқұм Марфуға Бектемірованың шығармашылығына арналған рухани іс-шарада қазақ жырының өрісі, тәрбиелік мәні мен танымдық сипаты туралы тақырыптар қозғалды.
Конференцияда университеттің әлеуметтік-мәдени даму жөніндегі проректоры Ләззат Нұрқатова сөз сөйледі, зиялы қауым өкілдері мен ғалымдар баяндама жасады. Ғылым және жоғары білім министрі Саясат Нұрбек пен «amanat» партиясының атқарушы хатшысы Дәулет Кәрібектің ақын шығармашылығының мәні мен маңызын ерекшелеген құттықтау хаттары оқылды. Филология ғылымдарының докторы, профессор, ақын Жанат Аймұхамбет баяндамасында ақын шығармашылығына жан-жақты тоқталды.
«Марфуғаның сыршыл да нәзік жанды ақын санасында орныққан аяулы ұғымдар оның өлеңдерінің тамыры болып бүлкілдеп, арманы мен аңсарын, өмірлік ұстанымын, өзіндік болмысын айқындайды. Әсіресе тазалықты, мейірімді, адалдықты тоғыстырған мөлдірлік – Марфуғаның ақындық табиғатын аңғартатын поэтикалық бейнеге айналған. Ақынның әлемі елеусіз ғана аққанымен, өзгелерді өзіне еріксіз тартатын мөп-мөлдір бұлақ тәрізді», деп түйіндеді ол баяндамасын.
Жазушы, публицист Бақыт Рүстемов, Тіл саясаты комитетінің төрағасы Ербол Тілешов жылы лебіз білдіріп, Жазушылар одағы Астана филиалының директоры, ақын Дәулеткерей Кәпұлы ақынның өлең өлкесіндегі өрнегіне назар аударса, Қырғыз Республикасының И.Арабаев атындағы мемлекеттік университетінің профессоры Аида Эгембердиева онлайн қатысып, баяндама жасады.
Ақын шығармашылығын кезінде Ақселеу Сейдімбек: «Жай сезім емес, поэзияға айналған сезім. Азапты ақылға жеңдіру, ақылды Алла атымен ұштастыру поэзия мәртебесін одан сайын биіктетіп тұр. Мұндай поэзия жаныңды жадыратады, рухыңды асқақтатады. Марфуға үшін аяулы сезім мен асқақ рухтың тұғыры туған жер, атамекен, қазақтың қадір-қасиеті», деп бағалағаны белгілі.
Ақмола облысында дүниеге келген Марфуға Бектемірова соңына аз мұра қалдырмаған. «Жанары жәудір дүние», «Айдыным менің», «Ғашық жүрек», «Еңлікгүл», «Менің Атлантидам», «Аққуым, менің қайдасың?», «Озера души», «Белый парус мечты» жыр жинақтарының авторы. Шығармалары бірнеше ұжымдық жинақтар мен антологияларға енген. Орыс ақыны Анна Ахматованың өлеңдерін аударған.
Іс-шара ақынның жары, Қазақстан Журналистер одағы сыйлығының лауреаты Есенгелді Сүйіновтің сөзімен қорытындыланды.