Талдықорған қаласында Ұлттық ұланның жауынгерлері жаппай төбелеске қатысушылардан травматикалық тапанша, пышақ, көзден жас ағызатын бүріккіштерді тәркіледі, олар жанжал кезінде аталған қаруларды қолданған, деп хабарлайды Egemen.kz.
Ұлттық ұлан баспасөз қызметінің мәліметінше 1 ақпанда сағат 18:45 шамасында Талдықорған қаласы Қабанбай батыр (Арбат) көшесі бойында патрульдік бекет қызметін атқарып жүрген әскери жасақ бір-бірімен төбелескен бұзақылар тобын байқаған. Ефрейтор Әділет Теміров, патрульші қатардағы жауынгерлер – Қылышбек Толыбаев, Ақан Иманбек, Ермек Нағыметовтер жедел іс-қимылдары әрі кәсіби шеберліктерімен төбелес шығарған топқа қатысы бар екі бұзақыны ұстап, қақтығыстың одан әрі шиеленісуіне жол бермеді және айналасындағылардың қауіпсіздігін сақтай білді.
Ұландықтар болған оқиғаның мән-жайын анықтау үшін қоғамдық тәртіпті бұзушыларды қалалық полиция басқармасының қызметкерлеріне жеткізді.