Қ.Сәтбаев университеті Физика-техникалық институтының жас ғалымдары Арман Өмірзақов пен Әлжан Байменов ванадий электролитін өндірудің отандық технологиясын жасап жатыр.
Ванадий аккумуляторлары – энергия сақтау қоймалары ретінде экологиялық таза және тұрақты энергиямен қамтамасыз ететін құрылғы. Кез келген электр қуатының үзілуі кезінде оларды қосымша қуат көзі ретінде пайдалануға болады. Сондай-ақ ол тұрақты және мықты электр желісі жоқ жерлерді электр көзімен қамтамасыз етуге кепілдік береді.
Алынған нәтижелерге қарай, алдағы уақытта ванадий аккумуляторлары өндірісін кешенді түрде қолға алу жоспарланып отыр. Себебі күн мен жел энергиясын бірлесіп пайдалану жаңартылатын энергия көздерінің экономикалық тиімділігін ондаған есе арттырады, жоғары деңгейлі экологиялық қауіпсіздікті қамтамасыз етеді.
Қазір әлемдік тәжірибеде тотығу-тотықсыздандыратын батареялар үшін ванадий электролиттерін өндіру қарқындап дамып жатыр. Өйткені ванадий аккумуляторы – мәңгілік энергия қоймасы ретінде жұмыс істейді. Ал оның жұмыс температурасының диапазоны 10-40 градус аралығында жүреді.
Бекзат ҚҰЛШАР,
Л.Н.Гумилев атындағы ЕҰУ студенті