Елордада Жас ғалымдар саммиті өтті. Саммит алаңына Ғылым және жоғары білім министрлігінің өкілдері, жас ғалымдар, докторанттар, ғылыми орталықтар мен университеттердің қызметкерлері, мемлекеттік сектордың өкілдері, кәсіпкерлер жиналды.
Саммиттің ашылуында сөз алған Ғылым комитеті басқармасының басшысы Ренат Елшибеков жастардың ғылымға келуіне мемлекеттің мүдделі екенін, соған сай ерекше қолдау көрсетіліп жатқанына тоқталды.
«Соңғы жылдары елімізде ғылымның дамуына айтарлықтай назар аударылып отыр. Біз ғылымды қажетсінетін экономика құру және отандық ғылымды жүйелі дамыту бойынша белсенді жұмысты көріп отырмыз. Соңғы 2-3 жылда ғылым бюджеті бірнеше есе өсті. Соның ішінде жас ғалымдарды қолдауға ерекше көңіл бөлініп келеді. Жас ғалымдар үшін арнайы «Жас ғалым» гранттары бар. Келесі үш жылдық кезеңде жас ғалымдардың зерттеулері үшін гранттарға 18 миллиард теңге бөлу көзделген. Жыл сайын әлемнің жетекші ғылыми орталықтарында 500 отандық ғалым тағылымдамадан өтеді. 2023 жылы 809 ғалымға әлемнің жетекші орталықтарында ғылыми тағылымдамадан өтуге гранттар берілді. Бұл бағыттағы жұмыс жалғасып жатыр. Университет ғылымы да дамып келеді. ЖОО жанынан инжиниринг орталықтары мен технопарктерді құруға 16 млрд теңге бөлінді», деді Р.Елшибеков.
Комитет өкілінің айтуынша, ғылымды басқару жүйесін жетілдіру, бизнесті ынталандыру үшін жұмыстар жүргізіліп жатыр. Атап айтқанда, «Ғылым және технологиялық саясат туралы» заң жобасы және «Кәсіпкерлік субъектілері үшін ҒЗТКЖ-ға (ғылыми-зерттеу және тәжірибелік-конструкторлық жұмыстар) шегерімдер туралы заңнамалық нормалар әзірленді. Қабылданған шаралардың нәтижелері қазірдің өзінде көрініп тұр. 2023 жылы ғылыми-зерттеу қызметімен айналысатын қызметкерлер саны, сондай-ақ Қазақстан Республикасында ҒЗТКЖ шығыны артты.
Жиында саясаттану ғылымындағы PhD Жақсылық Сабитов, академик Н.Д.Батпенов атындағы Травматология және ортопедия ұлттық ғылыми орталығы директорының орынбасары, PhD Арман Батпенов, қауымдастырылған профессор Серік Оразғалиев, Астана IT университеті Ғылым және инновация департаментінің директоры, PhD Нұрхат Жакиев, «Ғылым қоры» АҚ басқарма төрағасының орынбасары, PhD Алия Сембаева жастарды ғылымға шақыру мағынасында баяндама жасап, жас ғалымдарға арналған мемлекеттік қолдаудың шараларын, түрлері мен жолдары жөнінде кеңінен тарқатты.
Саммит барысында «Жас ғалымдардың тәжірибесі: мүмкіндіктері мен болашағы» тақырыбында сессия өтті. Баяндамашылар түрлі ғылыми саладағы жетістіктері мен ғылыми жобаларымен бөлісті. Талқылау Қазақстанның ғылыми қоғамдастығындағы жас ғалымдардың мүмкіндіктері мен болашағын анықтауға, сондай-ақ ел жастарының ғылыми қызметін одан әрі дамыту жолдарын іздеуге бағытталған.