Түркияның Ұлттық білім министрлігі тарих пәніне түбегейлі өзгерістер енгізілгенін, енді «Орталық Азия» терминінің орнына «Түркістан» атауы қолданылатынын хабарлады. Білім саласындағы сарапшылар мұндай қадам болашақ ұрпақтың түркілік рухты, отаншылдықты сезініп тәрбиеленуіне бағытталғанын мәлімдеді.
Түркия Президенті Режеп Тайип Ердоған «Түрік ғасыры» бағдарламасы аясында түркі әлемінің береке-бірлігін, жасампаздығын, меймандостығын айқындай отырып, «Түркі дәуірін» жалғастыруға ниетті екенін жариялады.
«Түркия Республикасы ретінде біз бүкіл Түркі әлемінің бейбітшілігіне, өркендеуіне әрі қауіпсіздігіне қадам жасауды жалғастырамыз. Біз «Түрік ғасыры» туралы көзқарасымызды Түркі Мемлекеттерінің Ұйымында кеңейте отырып, алдағы кезеңді түркі дәуіріне айналдыру үшін иық тіресе жұмыс істейміз», деді ол.
Түрік тарихшылары Ахмет Ташағыл мен Рамин Садык «TRT Haber» арнасына берген сұхбатында «Түркістан» ұғымының тарихи мәнін түсіндіріп берді.
«Түркілердің отаны деген мағынаны білдіретін «Түркістан» сөзі тарихтың алғашқы кезеңдерінен бері қолданылып келеді. XIX-ғасырдың екінші жартысындағы шапқыншылықтан соң Түркістан атауы Орталық Азия ұғымымен алмастырылып, кеңінен қолданыла бастады», деді А.Ташағыл.
Ал Рамин Садык Түркістан тұжырымдамасы жөніндегі көзқарасты Ұлттық білім министрлігінің оқулықтарға енгізуі өте дұрыс шешім екенін атап өтті.
«Түркия да, Түркістан да негізінен түркілер тұратын аймақты білдіреді. Біз тарихымызға, мәдениетімізге, өткенімізге қамқорлық жасауымыз керек», деді тарихшы.
Рамин Садык түркі әлемі үшін ортақ тарих, география, әдебиет, карталар мен әліпбиді құру жөніндегі белсенді жұмыс аясында Ұлттық білім министрлігінің «Түркістан» терминін оқулықтарға енгізуі елеулі өзгеріс екенін алға тартты. Оның айтуынша, бұл трансформация – тек Түркияға ғана емес, бүкіл түркі әлеміне, сондай-ақ түркі мемлекеттерінің әріптес елдеріне маңызды бастама және құнды үлес.
Осылайша, Түркияның Ұлттық білім министрлігі Ұлы Түркістанның тарихи даңқын қайтаруға зор қадам жасап отыр.