Назарбаев университетіндегі Жоғары білім беру мектебі әзірлеген «Декандар мектебі» академиялық көшбасшы бағдарламасы бойынша еліміздегі 33 жоғары оқу орнынан келген 78 факультет деканы білім алып жатыр. Бағдарлама аясында олар сарапшылармен бірге білім беру ұйымдарын стратегиялық жоспарлау және тиімді басқару мәселелерін талқылайды. Сонымен қатар стратегиялық жоспарларды әзірлеу мен жүзеге асыруды, қаржылық және ресурстарды басқару әдісін дұрыс қолдануды үйренеді.
Декандар алдында баяндама жасаған Ғылым және жоғары білім министрі Саясат Нұрбек өз сөзінде 34 шетелдік университет өкілін қамтыған халықаралық кеңес құрылғанын жеткізді.
«Біз қазір түбегейлі қайта құру кезеңіне аяқ бастық. Сондықтан министрлік өз алдына үш міндет қойып отыр: біріншісі – осы серіктестіктер арқылы Қазақстанды академиялық және ғылыми орталық ретінде құру; екіншісі – мемлекеттік университеттерді халықаралық зерттеу университеттеріне айналдыру, үшінші – технологиялар трансферті үшін осы платформаларды пайдалану», деді ол.
Бағдарлама шеңберінде NU сарапшылары білімдегі жаңа өзгерістерге қалай бейімделу, тәуекелдерді басқару және осы саладағы бизнес-үдерістері туралы ой-пікірлерін ортаға салды. Сондай-ақ NU президенті доктор Вакар Ахмад пен Жоғары білім мектебінің (GSE) деканы Аида Сағынтаева басқару тәжірибелерімен бөлісті.
«Университеттер күрделі мәселелерді шешіп, сыни тұрғыдан ойлайтын адамдардан тұрады. Егер сіз оларды басқаруға тырыссаңыз, сіз сәтсіздікке ұшырайсыз. Өйткені бұл ақылды адамдар қатаң нұсқауларды орындамайды. Менің жұмысым – таланттарды тауып, оларға жағдай жасау. Мықты көшбасшы азаматтарға өз мақсатына жетуге мүмкіндік береді. Ал менің рөлім – оларға бұл үшін мүмкіндік туғызу», дейді NU президенті доктор Вакар Ахмад.
Оқу барысында NU вице-президенті Асель Увалиева мен Қожа Ахмет Ясауи атындағы халықаралық қазақ-түрік университетінің профессоры Молдияр Ергебеков серіктестік құру және ресурстарды жұмылдырудағы коммуникациялық стратегияның маңызына арналған сессия өткізді. Оған қонақ ретінде шақырылған шетелдік білім беру сарапшысы Венера Байжігіт қатысушыларға әлеуметтік желілердегі жеке брендті қалай құруға болатыны туралы шеберлік сабағын ұйымдастырды. Ал Түркиядағы Коджаели денсаулық және технология университетінің ректоры Музаффер Элмас деректерге негізделген стратегиялық жоспарлау үшін мониторинг және бағалау жүйелері туралы тың ақпарат берді.
Бұдан бөлек, бағдарламада белгіленген «Декандар күнінде» қатысушылар аталған университеттегі Жоғары білім беру, Медицина, Инженерия және цифрлық ғылымдар сияқты түрлі ғылыми мектептің жұмысымен жақын танысты.
Айта кетейік, бағдарлама іске қосылған 25 қыркүйектен бері бес модуль өткен. Оның 2-уі Назарбаев университетінде болса, 3-уі Түркістандағы Қожа Ахмет Ясауи университетінде өткізілген. Ал 18-22 қараша аралығында Шанхай педагогикалық университетінде (SHNU) халықаралық бес күндік модуль өтеді. Мұнда қатысушылар жоғары білімді басқарудың халықаралық тәжірибесі мен зерттеулеріне байланысты тәжірибе алмасады.