Алматыда аса көрнекті ғалым Қаныш Сәтбаевтың 125 жылдығына орай Президент жанындағы Ұлттық ғылым академиясында кейінгі толқын ізденушілердің «Жас сәтбаевшы» атты I конгресі өтті. Онда қазақ ғылымының бастауында тұрған академиктің ғылымдағы ісі мен отандық ғылымды дамытудағы өлшеусіз еңбегі туралы айтылып, қазіргі ғылым жетістіктері, өзекті мәселелері талқыланды.
Конгресте Ғылым және жоғары білім вице-министрі Дархан Ахмед-Заки Мемлекеттік кеңесші Ерлан Қариннің, министр Саясат Нұрбектің құттықтауын оқып берді. Ал Парламент Мәжілісінің депутаты Жұлдыз Сүлейменова Сенат, Мәжіліс төрағаларының құттықтауын жеткізіп, жылы лебізін білдірді. Бүгінде білім мен ғылымның астанасына айналған Алматы қаласы әкімінің орынбасары Азамат Қалдыбеков жас зияткерлерге үлкен сенім артып, осы бағытта жігерлене жұмыс істеуге шақырды.
Жас ғалымдар кеңесінің төрағасы, PhD Мақсат Жабағин аталған кеңестің атқарған жұмысы жайында баяндады. Жарғыға сәйкес жас ғалымдар кеңесінің жұмысын Президиум басқарады. Оған Президент жанындағы Ұлттық құрылтай және Ғылым және техника жөніндегі ұлттық кеңестің мүшелері, республикадағы жас ғалымдар ұйымдарының төрағалары, Ұлттық ғылыми кеңес мүшелері, жоғары оқу орындары, ғылыми-зерттеу институттары жас ғалымдары кеңестерінің төрағалары, беделді жас ғалымдар енген. Мұның өзі еліміздегі ғылымды дамытуға жастардың белсенді кіріскендігін айғақтайды.
Қазіргі таңда Президент пәрменімен жаңа мәртебеге ие болған академия даму бағытын анықтап, ғылыми зерттеулердің басым бағыттарын анықтау, ақпараттық-талдамалық сүйемелдеу, ғылыми әлеуеттің жай-күйін бағалау, ғылыми зерттеулерді іске асырудың үздік халықаралық тәжірибесін енгізу, пәнаралық ғылыми-техникалық бағдарламаларды әзірлеу, ғылыми сыйлықтар мен стипендиялар беру бойынша конкурстарды ұйымдастыру бағытындағы қанатқақты жобаларды іске асырып келеді.
«Академияда Жас ғалымдар кеңесінің құрылуы – жүзеге асқан іргелі бастамалардың бірі болды. Ұлттық Ғылым академиясының құрамында осындай орган алғаш рет құрылып отыр. Кеңес жұмысы арқылы жас ғалымдар елдегі ғылымды дамыту бойынша басты шешімдерді дайындауға сындарлы түрде қатыса отырып, өз пікірлерін жоғары деңгейде жеткізуге толығымен мүмкіндік алды. Жас ғалымдар кеңесі жақында құрылғанына қарамастан, ғылыми ортаны жақсарту бойынша бірнеше рет маңызды ұсыныс жасап, сәтті қорғап шықты. Талантты жастар академияда жүзеге асып жатқан бастамаларға айтарлықтай үлес қосып келеді. Ақмола, Жамбыл, Шығыс Қазақстан және Қарағанды облыстарында академия президиумының көшпелі отырысы барысында «Қуатты ғылым – қуатты өңір» бастамасы іске қосылып, өңірлік филиалдары құрылды. Отандық ғылымның нақты жай-күйін бағалау үшін академия жанынан талдау орталығы жұмысын бастады», деді ҰҒА Басқарма президенті, академик Ақылбек Күрішбаев.
Халықаралық ынтымақтастықты кеңейту, жас ғалымдар диаспорасының жұмысын дамыту мақсатында АҚШ, Қытай, Ресей, Түркия елдерінің және Еуропа мен ТМД-ның бірқатар мемлекеттерінің ғылым академияларымен байланыс орнады. Осыған байланысты Ұлттық ғылым академиясында Қазақ-Неміс ғылыми-зерттеу ынтымақтастық орталығы және Қазақстан-Қытай ғылыми-техникалық инновациялық орталығы ашылып, форсайттық зерттеулер бойынша Қазақстан-Корея ғылыми-техникалық инновациялық орталығын құру бойынша келіссөздер жүріп жатыр. Еуропалық ядролық зерттеулер орталығының (ЦЕРН) өкілдігі де жұмысын бастамақшы.
Биыл алғаш рет Ғылым жөніндегі Ұлттық баяндама мазмұнына «Қазақстанның жас ғалымдарының жетістіктері» бөлімі енді. Алдағы уақытта бөлім жас ғалымдардың кәсіби мүмкіндіктерін кеңейту, талантты жастарды ғылымға тартуға ықпал ететін болады.
АЛМАТЫ