Биыл Әбілхан Қастеев атындағы өнер музейінің 90 жылдық мерейтойы. Осыған орай музейдің бай тарихы мен көпқырлы қызметін айшықтайтын кең ауқымды бағдарлама әзірленді.
Ә.Қастеев музейі – еліміздегі тарихы тағылымды, мазмұны бай өнер ордасының бірі. Музейде 26 мыңнан астам өнер туындысы бар. Онда қазақ халқының өнері мен рухани мұрасы қамтылған. Теңдессіз туындылар қатарында кескіндеме, графика, мүсін, сәндік-қолданбалы өнер жауһарлары ұсынылған. Олардың ішінде Қазақстан өнерінің алтын қорына енген түпнұсқа экспонаттар да бар.
Енді, міне, музейдің 90 жылдығы қарсаңында айтулы өнер ордасының ауқымды шығармашылық жоспарлары жүйеленді. Сондай айтулы оқиғалардың бірі – «Қазақстанның заманауи өнері» атты жаңа залдың ашылуы. Бұл экспозиция еліміздің жетекші суретшілерінің шығармаларын қамтиды. Қазақстанның сәндік-қолданбалы өнері – ежелгі дәуірден келе жатқан және біздің заманымызға дейін сақталған руханият пен дәстүрдің ұлттық бастауы саналатын маңызды бөлімді ұсынады.
Сондай-ақ биыл музей тарихы мен өркендеуіне арналған ретроспективті фотокөрме өткізу жоспарлануда. Музейдің бүгінге дейінгі тарихы мен өркендеу жолы жан-жақты қамтылатын көрмеде бірегей мұрағаттық құжаттар көшірмесі, фотосуреттер ұсынылады.1935 жылдан басталған ғылыми, қор сақтау, көрме ұйымдастыру және экскурсиялық қызметтерге ерекше назар аударылып, осы күнге дейін өткізіліп келе жатқан көптеген көрме жобасы мен ауқымды іс-шараның фотосуреттері көрсетіледі.
Бұдан бөлек, ұжым Мәдениет және ақпарат министрлігінің қолдауымен «Қазақстанның заманауи сәндік-қолданбалы өнері» атты екі томдық каталог шығаруды жоспарлап отыр. Каталогте металдан, тастан, ағаштан, былғарыдан жасалған бұйымдар, зергерлік бұйымдар, керамика, фарфор, шыны, гобелендер, киізден, жүннен және шиден жасалған сәндік панельдер бар. Туындылар 1938–2020 жылдар аралығын қамтиды.
Ал «Жанданған жауһарлар» көрмесінде 100-ге жуық реставрацияланған туынды ұсынылады. Кескіндеме, графика, мүсін және қолөнер, тоқу, зергерлік, киізден жасалған бұйымдар және т.б. реставрация жұмыстары сипатталған төлқұжаттарымен, «дейін» және «кейін» фотосуреттерімен бірге жүреді. Көрмеге көптеген жұмысқа экспозициялық көрініс беріп, көп күш жұмсаған, елеулі еңбек сіңірген аға буын реставраторлары шақырылады деп жоспарлануда.
Сонымен қатар мерейтойлық жылда Қазақстан мен әлем арасындағы мәдени диалогті нығайтуға бағытталған бірқатар ірі халықаралық жоба жүзеге асырылады. Атап айтсақ, жылдың маңызды жобаларының бірі – Мәскеудегі атақты Третьяков галереясында өтетін музей қорындағы Әбілхан Қастеев жұмыстарының көшпелі көрмесі. Онда шебердің 50 графика және акварель жұмыстары ұсынылады. Ретроспективалық көрмеде ресейлік көрермен суретшінің шығармашылық дамуының барлық кезеңдерін тамашалай алады. Ал Орал Таңсықбаевтың 120 жылдығына арналған Өзбекстан мәдениет және өнерді дамыту қоры ұйымдастырған халықаралық жоба Қазақстан мен Өзбекстанның жетекші музейлерінің коллекцияларын біріктіреді. Сондай-ақ Қытай Ұлттық музейінің халықаралық көрмесінде қытайлық ерекше кескіндеме, мүсін, гравюра, композициялық материал, акварель, гуашь және лак кескіндемесі секілді 50-ден астам туынды ұсынылады. Музей ауқымындағы тағы бір маңызды ғылыми оқиға – жыл сайынғы «Қастеев оқулары» ғылыми-практикалық конференциясы. Дәстүрлі іс-шарада музей ісін зерттеушілер мен өнертанушылар бас қосып, музей жұмысының маңызды мәселелері талқыланады деп күтіліп отыр.