Премьер-министрдің бірінші орынбасары Нұрлыбек Нәлібаев жұмыс сапары аясында Солтүстік Қазақстан облысына барып, өңірде жүзеге асырылып жатқан өнеркәсіптік, инфрақұрылымдық, энергетикалық және аграрлық жобалардың барысымен танысты.
Петропавл қаласында Нұрлыбек Нәлібаев трансформаторлар мен электротехникалық жабдықтардың құрамдас бөліктерін өндіруге маманданған «Петропавл электротехникалық зауытына» барды. Жобаның жалпы құны 10 млрд теңгені құрайды. Кәсіпорында 200 жаңа жұмыс орны ашылған. Өндіріс қуаты жылына 13 мың дана өнім шығаруға мүмкіндік береді.
Сонымен қатар Премьер-министрдің бірінші орынбасары өңірдегі теміржол жылжымалы құрамын өндіретін ірі машина жасау кәсіпорындарының бірі «ЗИКСТО» ЖШС қызметімен танысты. Былтыр мұнда жалпы аумағы 12 мың шаршы метрді құрайтын жаңа зауыттың құрылысы аяқталып, роботтандырылған заманауи технологиялық желі іске қосылған. Жобаның жалпы құны 25 млрд теңгені құрады, 300 жаңа жұмыс орны ашылды.
Бұған қоса Н.Нәлібаев CLAAS ауыл шаруашылығы техникасын құрастыру зауыты, «Масло-Дел» ЖШС май экстракциялау зауыты, «Зеленый Север» ЖШС жылыжай кешені мен «Петропавл ауыр машина жасау зауыты» АҚ-да болды. Аталған жобалар өңірдің өнеркәсіптік және агроөнеркәсіптік әлеуетін нығайтуға, шикізатты терең өңдеуге бағытталған.
Сапар барысында энергетикалық қауіпсіздік мәселелеріне де ерекше назар аударылды. Петропавл ЖЭО-2 нысанында Премьер-министрдің бірінші орынбасары 2026–2027 жылдардағы жылыту маусымына дайындық, жөндеу мен инвестициялық бағдарламалардың жүзеге асырылу барысымен танысты. Кәсіпорынның бас директоры Анатолий Казановскийдің айтуынша, 2022 жылы кәсіпорында 103 технологиялық бұзушылық тіркелген. Ауқымды жөндеу бағдарламаларының нәтижесінде 2024–2025 жылдары бұл көрсеткіш 55-ке дейін төмендеді, ал өткен жылу беру маусымының қорытындысында тек 23 жағдай тіркелді. Қазір жаңа жылыту кезеңіне дайындық қарқынды жүргізіліп жатыр. Былтыр инвестициялық бағдарламаның көлемі 15 млрд теңгені құраса, биыл бұл мақсатқа 16,2 млрд теңге қарастырылған.
Нұрлыбек Нәлібаев Петропавл қаласындағы Универсальная көшесіндегі жол өткелі құрылысының жобасымен де танысты. Бүгінде нысан 90%-ға дайын. Бұдан бөлек, Премьер-министрдің бірінші орынбасары Пестрое көлі жағалауындағы эко-паркке барды. Жоба рекреациялық инфрақұрылымды дамытуға, ішкі туризмді қолдауға, қалалық ортаның сапасын арттыруға бағытталған.
«Эко-парк – тұрғындар мен балалы отбасылар үшін қолайлы демалыс орны. Мұнда веложолдар мен жаяу жүргіншілер аймақтары қарастырылып, халықтың жайлы демалуына барлық жағдай жасалған. Мемлекет басшысы атап өткендей, қалалар таза әрі өмір сүруге қолайлы болуға тиіс. Петропавлда халық игілігі үшін ауқымды жұмыстар атқарылуда. Ендігі міндет – жобаны сапалы аяқтап, осындай бастамаларды жүйелі түрде жалғастыру», деді Н.Нәлібаев.
Одан кейін Нұрлыбек Нәлібаев Новоникольское ауылындағы «Зенченко и К» КС-нің заманауи тауарлы сүт фермасына барды. Заманауи нысан 8 мың басқа арналып «Карусель» қондырғысымен жабдықталған. Жобаның жалпы құны 9 млрд теңгені құрайды. Ал өндіріс орны биыл тамыз айында іске қосылады деп жоспарланып отыр.
Бүгінде «Зенченко и К» КС бизнестің әлеуметтік жауапкершілігінің үлгісін көрсетіп келеді. Кәсіпорын қаражаты есебінен Новоникольское ауылында тұрғын үйлер мен әлеуметтік нысандар салынып жатыр. Кейінгі бес жылда әлеуметтік жауапты бизнес ауыл тұрғындарының әл-ауқатын арттыру мақсатында 3,2 млрд теңгеден астам қаржы бағыттады.
Аталған жобалардың жүзеге асырылуы Солтүстік Қазақстан облысының өнеркәсіптік әрі аграрлық әлеуетін нығайтып, жаңа жұмыс орындарын ашуға, инфрақұрылымды жаңғыртуға, халықтың өмір сүру сапасын жақсартуға мүмкіндік береді.