Америка-Қазақстан энергетикалық әріптестігі аясында ҚР Индустрия және жаңа технологиялар министрлігі мен АҚШ-тың Энергетика министрлігі бірлесіп қайталама қуат көздерін дамыту мен қуат тиімділігі кедергілерін еңсеру және ынталандыру бойынша семинар өткізді. Екі күнге созылған басқосуға АҚШ Энергетика министрлігі жанындағы Қайталама қуат көздері ұлттық зертханасының, Джорджия штаты технология институты мен Hudson Technologіes компаниясының сарапшылары қатысты. Қазақстан тарапынан семинар жұмысын Үкімет, өнеркәсіп кәсіпорындары мен өзге де ұйымдардың өкілдері тыңдады. Басқосу барысында АҚШ тарапының табыстары, таза энергетикалық технологиялар енгізуде қандай кедергілерге кездескені жан-жақты айтылды.
Қайталама қуат көздері мәселелері бойынша пікірталастарда аталған саладағы Қазақстанның әлеуеті, осы бағытта ілгері жылжи отырып, ықтимал кедергілерді қалай еңсеруге болатыны, жел энергиясын пайдалану ісінде мүмкіндікті айқындау үшін карта жасауда талдамаларды қалайша кәдеге асыруға болатыны туралы әңгіме қозғалды.
Қуат тиімділігі мәселелерімен айналысатын топ қуат басқару бағдарламаларын жүзеге асыру жолдарын оқып, өндірістік қуат тиімділігі стандарттары бойынша шолулар өткізді. Екі тараптан қатысушылар таза энергияны дамыту үшін стратегия жасау қажеттігін атап көрсетті.
Америка Құрама Штаттары мен Қазақстан энергетика саласында ұзақ уақыттан бері ынтымақтасып келеді. Үстіміздегі жылдың 11 сәуірінде АҚШ Президенті Барак Обама мен Қазақстан Президенті Нұрсұлтан Назарбаев Вашингтонда өткен ядролық қауіпсіздік жөніндегі саммитте кездескен болатын. Сол жолы екі жақты мәлімдеме қабылданып, онда ядролық қауіпсіздік пен таратпау, Орталық Азиядағы өңірлік қауіпсіздікті күшейту мақсатында екіжақты ынтымақтастықты арттыру атап көрсетілген еді. Оның ішінде мемлекет басшылары Қазақстан Республикасы мен Америка Құрама Штаттары арасындағы 15 жылдық тығыз ынтымақтастық тәжірибесі ядролық қаруды қолдану қатерін қысқарту ісінде табыс әкелгеніне екпін түсірген-тін. Сондай-ақ ядролық энергетика саласында және қуаттың баламалы көздері бойынша ынтымақтастықты нығайтуға ниеттестік танытқан болатын.
“Егемен-ақпарат”.