Толеранттылық пен мәдениетаралық үнқатысу

Қазақстанның төрағалығы барысындағы басымдықтар болып табылады Гаагада (Нидерланды Корольдігі) осы елдегі Қазақстан елшілігінің бастамасы бойынша кеше болған конференцияда этнодіни пікір алуандығы мен көші-қон мәселелері талқыланды, деп хабарлады ҚР Парламенті Сенатының баспасөз қызметі. Қазақстанның ЕҚЫҰ-ға төраға­лық етуі аясында ұйымдастырылған шараға Сенаттың Әлеуметтік-мә­дени даму комитетінің төрағасы Ақан Бижанов бастаған қазақ­стан­дық парламентшілер белсенді түрде қатысуда. Конференцияда Қазақстан де­легациясының басшысы А.Бижанов негізгі баяндама жасады. Талқы­ла­нып отырған тақырыптың өзекті екенін атап өте келіп, сенатор “то­лерант­тылық пен мәдениетаралық үнқа­ты­суды ілгерілету ЕҚЫҰ-ға Қазақ­станның төрағалық етуіндегі негізгі басымдық және “қосымша құн” ретінде қарастырылатынын” айтты. А.Бижанов ЕҚЫҰ-ға төрағалық еткен кездегі Қазақстанның бас­та­малары туралы айта келіп, ұлтара­лық және конфессияаралық келі­сім­ді нығайту саласындағы мем­ле­кеттік саясат мәселелеріне тоқ­талды. “Қазақстан Президенті Нұрсұл­тан Назарбаев жүргізіп отырған сындарлы және салиқалы сая­сат­тың арқасында этномәдени алуан­дық пен бірлікті қайта түлету, сақтау және дамыту жөніндегі мем­лекеттік саясат табысты жүзеге асы­рылып келеді, төзімділік, өзара сыйластық қалыптасты, сондай-ақ оқшаулану, этностық және діни оғаштық іске аспады”, – деді сенатор. Ұлтаралық толеранттылықтың қазақстандық үлгісін нығайтуда Қазақстан халқы Ассамблеясын атай келіп, А.Бижанов бұл құры­лымның қызметін заңнамалық тұрғыда реттеу туралы айтты. Конфессияаралық келісімді қамтамасыз ету мәселелеріне қа­тысты А.Бижанов “дінаралық үн­қа­тысудың қазақстандық үлгісінде дін­нің мемлекеттен бөлінуінің конс­титуциялық қағидасы бар екенін, барлық діни бірлестіктердің заң алдында тең және діни қаты­настардағы барлық мәселелердің тек қана құқықтық кеңістікте шешілетінін” атап өтті. Президент Н.Назарбаевтың бас­тамасы бойынша жүзеге асқан Әлемдік және дәстүрлі діндер ли­дер­лерінің съездеріне әлемдік қо­ғамдастықтың ықыласы арта түс­кенін айтқан сенатор, діни басшы­лар­дың басқосуы өркениетаралық және дінаралық үнқатысуды қа­лыптастыру жөніндегі жаһандық үдерістердің бөлінбес бөлшегіне айналып отырғанын жеткізді. Конференция аясында қазақ­стан­дық парламентшілердің ЕҚЫҰ-ның Аз ұлттар істері жөнін­дегі Жоғарғы комиссары К.Волле­бек­пен, Нидерланды Корольдігі Бас штаттары Бірінші палатасының төрағасы Р.Ван дер Линденмен және Нидерланды Парламентінің сенатор­ларымен кездесулері бары­сын­да екіжақты ынтымақтастық және өзара парламентаралық іс-қи­мылды кеңей­ту мәселелері талқыланды.