Кеше Мемлекет басшысы Нұрсұлтан Назарбаев «Қазақстан» орталық концерт залынан «Кешіккен махаббат» атты жаңа қазақстандық көркем фильмді тамашалады. Француздың белгілі актері Жерар Депардьенің қатысуымен түсірілген аталмыш фильмнің осынау алғашқы таныстырылымында атақты актердің өзі де, басты рөлдерде ойнаған өзде де әртістер Елбасымен бірге отырып фильмді көрді.
Түсірілу жұмыстары небәрі 24 күннің ішінде орындалғанымен, бұл фильмді жасауға бір жылдай уақыт кеткен көрінеді. Лирикалық комедия жанрындағы кинолентаны Шәкен Айманов атындағы Қазақфильм кинокомпаниясы мен «Танарис» кинокомпаниясының бірлесіп түсіргенін де айта кетсек, онда француз актері Жерар Депардье және Нұржұман Ықтымбаев, Наталья Гвоздикова, Болат Қалымбеков, Наталья Орынбасарова сынды көрнекті кино әртістері ойнады. Ал сценарийдің авторлары – Ахтан Арым Құбат, Сергей Әзімов және Ғазиз Насыров болса, қоюшы режиссері – Сәбит Құрманбеков.
Фильм оқиғасының негізгі желісі – қартаң тартқан үш дос туралы. Екі дос Қалтай есімді үшінші досын үйлендірмек болып, оған қалыңдық іздеп, құда түсу әрекеттерін жасайды. Ақырында қарттар шын махаббаттың шырмауына түсіп, олардың ойлары басқа жолмен жүзеге асады. Сценарий авторы С.Әзімовтің айтуынша, картинаның жалпы бюджеті 1,5 млн. АҚШ долларын құраған көрінеді.
Арай ҮЙРЕНІШБЕКҚЫЗЫ.