Жетісуда жарыса бой көтерген құрылыс нысандары мешін жылы да жалғасын табады. Соның бірегейі Талдықорғанда салынатын Алматы облыстық драма театры болып саналады. Құрылыс нысанының жалпы аумағы 10513,40 шаршы метр болатындығы, онда 3 қабатты ғимарат бой көтеретіндігі жоспарланған. Көрген жанның көзін тойдыратын ғимараттың сырт келбеті әсемдігімен қала сәнін көркейте түссе, ішіне 510 адам сыйып нағыз өнер ордасына айналары хақ. Өңір басшысының бұл маңызды мәселені алдын ала кеңінен ойластырғандығы сол, бүгінде драма театрдың құрылыс жұмыстарын жүргізу үшін экономикалық-техникалық негіздегі кешенді сараптаманың қорытындысы да шықты. Жобаны талқылап, қарау үшін мемлекеттік сатып алу жүргізуге конкурстық құжаттар дайындалуда. Бұл дегеніміз, белгіленген уақытта құрылыс жұмысын жүргізетін құрылыс компаниясын анықтап, заңнама шеңберінде драма театр құрылысын ешқандай кедергісіз бастауға ашылған жол болып саналады. Сөйтіп, Талдықорғанның батысында бой көтеретін драма театры жаңа шағын ауданда жарыса салынып, сап түзеген құрылыс нысандарымен қанаттаса қаланы түрлендіре түсетініне кәміл сенім бар.
Нұрбол ӘЛДІБАЕВ,
«Егемен Қазақстан».
ТАЛДЫҚОРҒАН.