Бүгінде Жарма ауданындағы Әуезов ауылы тұрғындарының денсаулығын сақтауға қолайлы жағдай жасалған. Елді мекеннің тұрғындарына енді орталыққа қарай, яғни Өскемен мен Семей қалаларындағы медициналық мекемелерге немесе аудандық ауруханаға жүгінудің аса қажеті жоқ. Әуезовтіктер уақыт пен қаражат шығындамай-ақ, туған ауылдарында дәрігерлік тексеруден өте алады. Қазіргі кезде ауыл амбулаториясында құны 3 миллион теңге тұратын қан құрамын тексеруге арналған құрал-жабдықтар мен көз тонометрі бар.
Жуырда аталған медициналық аппараттар Жарма ауданы әкімдігі мен «Бақыршық тау-кен өндіру кәсіпорны» ЖШС арасында бекітілген әлеуметтік-экономикалық меморандум шеңберінде амбулаторияға сыйға тартылды. Соның арқасында Әуезов тұрғындары өзге елді мекендерде кездесе бермейтін MicroCC-20 Plus гематологиялық автоматты анализатор аппараты мен СОЭ-метр ПР-3 құралы арқылы қан құрамын тексеруге арналған және ИГД-02 «ПРА» маркалы көз ішіндегі қысымды тіркейтін көз тонометріне ие болды. Құнды сыйлықтарды дәрігерлік медициналық компания жетекшілері салтанатты түрде табыс етті.
– «Полиметалл» компаниясы кәсіпорын қызметкерлері мен ауыл тұрғындары жайлы тұрмыс кешуі үшін қолдан келген көмекті аянып қалмайды. Айталық, 2014 жылы дәрігерлік амбулаторияға науқастарды жедел ауруханаға жеткізуге және бастапқы медициналық көмек көрсетуге арналған жедел жәрдем көлігін тарту еткен едік. Ал 2015 жылы компания жетекшілігі амбулаторияның сыртқы қасбетін жөндеуден өткізу және заманауи қажетті құрал-жабдықтар сатып алу жөнінде шешім шығарды, – деді Бақыршық тау-кен өндіру кәсіпорнының бас директоры Юрий Овчинников.
Жарма ауданының әкімі Нұрлан Сыдықов «Полиметалл» компаниясының қарапайым ауыл тұрғындарына жасаған көмегін жоғары бағалап, өңірдің әлеуметтік және экономикалық дамуына үлес қоса берулеріне тілектестігін білдірді.
Думан АНАШ,
«Егемен Қазақстан».
Шығыс Қазақстан облысы,
Жарма ауданы.