Ақыл мен парасат адамзатты сақтайды

Тілшілер қосынының телефоны шылдыр ете түсті. Телефон құлағын көтерген кезде арғы жақтан есімі елге елеулі азамат, ел мен жердің тыныштығы мен амандығын тілеп зыр жүгіріп жүрген жана­шыр жан, облыстағы үкіметтік емес экологиялық ұйымдар қауым­дас­тығының төрағасы Ғазиз ХАЙМУЛДИННІҢ таныс дауы­сы естілді. Амандық-саулық сұрасқан соң іле-шала ол кісі Елба­сы­ның АҚШ-тың Вашингтон қаласында өткізілген саммитте сөй­леген сөзінен айрықша әсер алғанын айтып берді. «Мен саған Елбасының осы ақыл мен парасатқа толы толғанысынан алған әсерім мен көкейге келген ой-пікірімді айтсам ба деп едім. Содан соң оны «Егеменге» жолдасаң дұрыс болар еді. Соған қалай қарайсың?» деді ол. – Ғазиз аға! Іздеп отырғаны­мыз да өзіңіздей ел ағаларының ой-пікірі емес пе?! Сәл күте тұры­ңыз. Қа­зір сізге барамын, дедім мен көтерің­кі көңілмен. Кездескен сәт­те Ғ.Хаймулдин Елбасы сөзі­нен ұққан-түйгенін былайша жеткізді. – Мен ең алдымен Қазақстан басшысының Кеңес Одағы тарамай тұрған кезде Семей ядро­лық сынақ полигонын жабу жөнін­дегі шығарған Жарлығы ерлікке парапар іс болғанын айтқым келеді. Бұл ядролық қарудан әлем­ді азат ету жөніндегі тұңғыш қадам болғанымен ерекшеленеді. Әрі бұл күн Қазақстан басшы­сы­­ның ұсынысы бойынша Ядро­лық қарусыздану жө­нін­дегі халық­аралық күн болып бел­гі­ленді. Сондай-ақ, бұл күн адам­зат­қа жаппай қырып-жоятын ядролық қаруды қолдану шексіз қасірет әкелетінін алғаш рет ұғындыра алған тарихи күн болуымен де айрықша. Бұған қоса, менің ойымша, 29 тамызды тұм­са табиғатты бұзбай, оның байлығын қорша­ған ортаға зиян келтірмей тиімді түрде игеру мен пайдалану­ды мең­зеген, бақытты ғұмыр кешуді көксеген күн деп те түсінуге болады. Бұл осындай бағыт­тағы бағдарламаның бастау көзі тәріздес. Ал АҚШ-тың Вашингтон қаласында ядролық қарусыздану тақырыбында өткізілген саммитте Елбасымыздың сөзіне әлемдегі ең мықты, ең жақсы дамыған өркениетті мемлекет басшыларының түсіністікпен құлақ асуы, біздің Президенттің ядролық қарусыздану жөніндегі айтқан сындарлы ұсыныстарының қабылдануы, шын мәнінде, атап айтуға тұрарлық мәселе. Менің ойымша, бұл жалаң ұғым емес. Жалаң ұсыныс та емес. Мұның арғы жағында қазақ деген халық­т­ың, қазақ деген ұлттың өкілі­­нің сөзі әлемдік деңгейде қабыл­данып, әлемдік деңгейде мойындалды деген терең түсінік жатыр. Өзгені қайдам, өз басым дәл осы сәтте өмірге қазақ болып туғаным үшін шексіз бақытты сезінгендей күйге түстім. – Ғазиз Усағалиұлы, Қазақ­стан басшысының осы саммитте қарулануға байланыс­ты халықаралық терроризмді бірлесіп ауыздықтау жөніндегі ой-пікірі мен ұсынысы туралы не айтар едіңіз? – Елбасымыз әлемдік ауқым­дағы терроризм көріністері бірінші кезекте адамдарды қырып-жоюды мақсат ететінін, терроршылар арам пиғылдарын іске асыру үшін қарулануды көздейтінін атап көрсетті. Терроризмнің бас­ты мақсаты – қарулану. Жай қару бол­са да ештеңе емес-ау, кесірлер, тіпті, атом қаруларын қолдануға дейінгі іс-әрекеттерге бара алатынын аңғартып жүр. Елбасы атап көрсеткендей, ажал себетін қару мен оны дамыту технологиялары ірі державалардың қосарланған стандарттарының салдарынан бүкіл әлемге тарауда. Олардың террор­шылардың қолына уақыт өте келе түсуі әбден мүмкін. Қазақ­­стан басшысы әлемнің ірі мемлекет басшыларының назарын осы мәселенің алдын алуға аударды. – Қазақстан Президенті саммитте адамзатқа «XXI ғасыр: Соғыс­сыз әлем» атты кең ауқым­­­ды бағдарлама қажет еке­нін алға тартты. Бұған не дейсіз? – Әлемдегі көшбасшы мем­лекет басшылары бұл ұсыныс­ты қолдағаны Қазақстан басшы­сы­ның ұсынысы олардың да ойы­нан шыққанын көрсетеді. Әлем­де адамдардың тыныш, соғыс­сыз өмір сүруінен артық еш­қан­дай құндылық, ешқандай рахат жоқ. Тек бір ғана Қазақстан халқы­ның ғана емес, барша әлемдік қауымдастықтың болашағын ойлаған, XXI ғасырда өмір сүре­тін және жұмыс істейтін өске­лең ұрпақтың тағдырына алаң­даушылық білдірген Нұрсұлтан Назарбаевтың бай парасатына аса тәнтіміз. Абай атамыз айт­қан: «Адамзаттың бәрін сүй, бауы­рым деп» келетін өлең шу­мақ­тары дәл осындайда еске түсе­ді. Н.Ә.Назарбаев өзге мемлекет басшылары мен әлемдік ли­дерлердің назарын ядролық қарусыздану жөнінде қашанда ақыл мен парасатқа жүгіну артық­тық етпейтініне аударды. Сірә, бұдан артық ізгілікті, бұдан артық парасаттылықты таба алар ма екенбіз. Әй, қайдам?! – Әңгімеңізге рахмет. Әңгімелескен Темір ҚҰСАЙЫН, «Егемен Қазақстан». ОРАЛ.