ПЕТРОПАВЛ. 3 мамыр. Әділет министрінің бұйрығымен Руслан Сұлтанұлы Кәктай Солтүстік Қазақстан облыстық әділет департаменті басшысының міндетін атқарушы болып тағайындалды. Бұл туралы облыстық әкімдіктің баспасөз қызметіне сілтеме жасаған egemen.kz тілшісі хабарлады.
Руслан Кәктай 1979 жылы туған. Ол – Қарағандының «Фемида» заң институтын және экономика университетін заңгер, экономист мамандықтары бойынша бітірген.
Еңбек жолын 2001 жылы Қарағанды облысы бойынша қаржы полициясы департаментінің экономикалық қылмыстарды ашу жөніндегі басқармасының инспекторынан бастап, 2001 – 2011 жылдары экономикалық және сыбайлас жемқорлық қылмыстарымен күрес департаментінде түрлі қызметтер атқарған. 2011 – 2012 жылдары Солтүстік Қазақстан облысы бойынша экономикалық және сыбайлас жемқорлық қылмыстарымен күрес жөніндегі департамент басқармасы бастығының орынбасары болып істеген.
2012 – 2015 жылдары Әділет министрлігі сот актілерін орындау жөніндегі комитетінің тұтқындалған және мемлекет кірісіне алынған мүліктер бойынша жұмысты ұйымдастыру басқармасының бастығы, Әділет министрінің көмекшісі, Астана қаласы әділет департаменті басшысының орынбасары, Астана қаласы орталық сот сараптамасы институтының директоры қызметтерін атқарған.
Осы тағайындауға дейін Әділет министрлігінің заңға сәйкес актілер департаменті көлік, инфрақұрылым және телекоммуникациялар мәселелері бойынша заңға сәйкес актілер сараптамалары басқармасының сарапшысы болған.
Өмір Есқали.
Дерек, фото: Солтүстік Қазақстан облыстық әкімінің баспасөз қызметі.