ХАТ-ҚОРЖЫН

ОҚЫРМАН  ...мәселе көтереді Ескерусіз қала бере ме? Бірде «Солтүстік Қазақстан об­лысының энциклопедиясын»­ ақтарып отырып, бұрын-соң­ды естімеген Павел Се­ме­­но­вич­ Свечников деген Ке­ңес Ода­ғының Батыры жайлы де­рек­ті кез­дестірдім. Шал ақын ауда­ны­ның Коноваловка ауы­лында 1926 жылы туған екен. Аштық аранын ашып, ау­қат­ты адамдардың мал-мүлкі тәр­кі­лен­ген кезде Свечниковтер Қыр­­ғызстанға көшуге мәжбүр болған. Ұлы Отан соғысы бастал­ған­да Павел Қырғыз КСР-і Са­ку­лук ауданындағы Қызыл ту елді ме­кенінде жетінші сынып бі­тірген көрінеді. Әкесі май­данда ауыр шайқастардың бірінде ерлікпен қаза табады. Оның кегін алу үшін Павел жасын ұлғайтып көрсетіп 1943 жылдың қаңтарында соғысқа араласады. Қан майданда көр­сеткен ерлігі үшін Кеңес Ода­ғының Батыры атанады. Украи­на жеріндегі қантөгіс шай­қаста он сегізге енді толған өрімдей жігіт ауыр жараланып, көз жұмған. Бір айта кетер­лігі, Павел Све­чниковтің есімі сол­түстік­қа­зақстандық Кеңес Ода­ғының Батырлары тізімі­нің арасын­да жоқ. Сірә, майданға Қыр­ғыз­станнан шақыртыл­ғандықтан, облыс тізіміне енбей қалған сыңайлы. Батыр – халықтікі, бүтін елдікі. Аудандық ардагерлер кеңесінің есеп беру конференциясында осы жайтты ақсақалдар назарына жеткіздім. Қырыққа жуық еңбек ардагерлері, зейнеткерлер қол қойған хат аудан әкімі Ербол Сағдиевқа жолданды. Қойшыбай ШӘНИЕВ, Қазақстан Журналистер одағының мүшесі Солтүстік Қазақстан облысы, Шал ақын ауданы ...ұсыныс жасайды Ескерткіш неге жоқ? Әлемде В.Ленинге арналған 14290 ескерткіш болыпты. Со­ның 500-і біздің Қазақстанда екен. Ком­мунистердің Ильичке де­ген құр­метін түсінуге болады. Ал Алаш ардақтысы Әли­хан Бөкейханов бабамызға де­ген құрметіміз кемшін. ЮНЕСКО-ның өзі жар салып, Әли­хан Бөкейхановтың 150 жыл­дығын әлемдік деңгейде атап өтейік деп жатқанда біздің жайма-шуақ отыруымыз еш жараспайды. Осы аяда біздер Әлихан Бөкейханов есімін қазақ баласының санасында мәңгі қалдыру қадамына баруымыз қажет. Яғни, Әлекең­дей Алаш ардақтысына қандай ескертіш орнатсақ та жарасымды болар еді. Менің айтайын деген ұсынысым осы. Қасымбек МЕДИЕВ, Қарағанды қаласының құрметті азаматы ҚАРАҒАНДЫ ...ой бөліседі Төзімділікке тәрбиелей білейік Жас мамандарды тәрбиелеу оңай емес. Соның ішінде қылмыстық атқару жүйесі органдарына жұмысқа кірген жас қызметкерлерді білікті және төзімді мамандарға айналдыру – қиынның қиыны. Осы тұрғыда жастардың жақсы маман болып қалыптасуы үшін тәлімгерлердің рөлі үлкен деп есептейміз. Мықты маман тәлім­гер ең алдымен оның жеке өмірімен жақсы таныс болуы керек. Бұл үшін олар өз қамқор­лығындағы жас мамандармен жеке әңгімелесуі тиіс. Бұл арада тәлімгер жас маманға атқарып жүрген қызметінің бүге-шегесі мен қыр-сырын толық таныс­тырып, қажет болғанда ақыл-кеңесін беріп отыру керек. Тек сонда ғана тәлімгер жұмысы өз нәтижесін береді. Біздің мекемеде осындай же­місті жұмысымен көзге түсіп, көп­шілікке үлгі болып жүрген тәлімгерлер аз емес. Олардың қатарында аға прапорщиктер Нұртай Ғабдуллин, Еркін Мұхамеджанов, Есенаман Аман­жолов пен Қайрат Әйті­мовтің есімдерін атауға болады. Олардан тәлім алған талай өрендер бүгінде түзеу мекемелерінде абыройлы қызмет атқарып жүр. Ахмет МАХМУДОВ, РУ-170/1 мекемесі бастығының орынбасары, әділет аға лейтенанты ОРАЛ ...ризашылық білдіреді Жоқ, ұмытуға болмайды! Біздің ауылдың тұрғындары көптен бері соғысқа аттанған азаматтарына белгі қалдыруды ойлайтын еді. Ақылдаса келе ескерткіш тақта ашу үшін бәрі қаржы жинап, биыл 9 мамыр ме­рекесінде ауылда еске алу шарасын жасап, салтанатты рәсім өтті. Бұл ескерткіш тақтаға Жасқайрат ауылынан соғысқа аттанған 84 азаматтың есімдері жазылды. Олардың 51-і соғыста қаза тауып, хабарсыз кетсе, 33-і елге оралыпты. Бүгінде солар­дан көзі тірі екі ардагер – Жапар Кісембеков пен Қайыр Ха­сенов ақсақалдар арамызда жүр. Ескерткіш мектептің алдына орналасқан. Енді жыл сайын ауыл тұрғындары 9 мамыр күні осы жерге жиналып, соғыстан оралмаған, қаза тап­қан ауылдас­тарын еске алып, аталарының есімдерін бүгінгі ұрпақ жадында мәңгі сақтап отыратын болады. Аудан, ауыл тұрғындары осы бір тарихи сәттің куәсі болып, Жасқайрат ауылы тұрғындарының ұйым­шылдығына, береке-бірлік­теріне сүйсініп, көпке үлгі бо­ларлық сауапты істеріне риза­шылықтарын білдіріп жатты. Ербол АМАНҒАЗЫҰЛЫ Павлодар облысы, Қашыр ауданы, Жасқайрат ауылы ...мақтан тұтады Үздік шықты Сәуір айында Байқоңыр қала­сында «Ғылым әлемін аша­мыз» атты оқушылар мен жасөс­пірімдердің ғарыштық зерт­теу­лер байқауы өткізілген бола­тын. Осы мәртебесі жоға­ры, қоя­тын талабы биік бай­­қау­ға қатыс­­­қан біздің ауда­ны­мыз­да­ғы «Сәулет» мектеп-ли­цейі­нің 11-сы­нып оқушысы Саян Жұрта­баев жеңімпаз атанып қайтты. Ол – ғарыш тақы­рыбында­ғы әртүрлі әде­биеттер мен ғы­лыми зерттеулерге ұдайы ден қойып, үнемі ізденіп жүре­тін дарынды шәкірт­теріміздің бірі. Үнемі үмітімізді ақтап келе­ді. Бұл жолы да ол өзінің алға қой­ған мақсатының үдесінен шыға білді. С.Жұртабаевтың жұмысы республика бойынша қатысқан жүздеген үміткер арасынан үздік шықты. Соған сай ол білім грантын ұтып алды. Талантты шәкіртіміз ендігі жерде ұлттық бірыңғай тестілеу сынағынан босатылып, өзі қалаған жоғары техникалық оқу орнында оқып, арнайы мамандықтың иесі болмақ. Біз мұндай дарынды шәкіртімізді мақтан тұтамыз. Айнагүл ДӘКІШЕВА, «Сәулет» мектеп-лицейінің  тәрбие ісі жөніндегі орынбасары Батыс Қазақстан облысы, Тасқала ауданы