Бірқатар халықаралық құжаттар қабылданды

Мәжіліс Төрағасы Орал Мұхамеджановтың жетекшілігімен өткен палатаның сәрсенбі күнгі жалпы отырысының күн тәр­ті­бін­де он бір мәселе қаралды. Сондай-ақ депутаттар әр түрлі түйт­кілдер бойынша бір сағаттан астам уақыт өз сауалдарын жол­дады. Оларда түрлі жағдайларға қатысты мәселелер көтерілді. Үкімет басшысының атына жол­даған сауалында Амангелді Мо­­мышев даңқты генерал Сабыр Рахимовтың биіктігі төрт метрлік ескерткішін Өзбекстан тарабы алып тастағандықтан, оның ескерткіштерін Алматы және Астана қа­лаларында ашып, бірқатар әлеу­мет­тік нысандарға есімін беру қажеттігін көлденең тартты. Депутат сондай-ақ аталған ван­дал­дық әрекеттері үшін көрші елге не Үкі­мет, не еліміздің сыртқы саясат ве­домствосы тарапынан қар­сылық но­тасы жолдан­ба­ға­ны­на қынжы­лы­сын білдірді. Осы ретте халық қа­лаулысы Өзбек­стан­да 2 миллионнан астам этнос­тық қазақтың тұраты­нын, бұл әрекет ұлттың ар-намы­сына қаяу түсіретінін ашына жеткізді. Нұрлан Өнербаев өзінің де­путаттық сауалында «Эйр Астана» әуе компаниясын сын тезіне ал­ды. Депутат аталған компания ұшақ­тарында елімізді та­ныстыру Алматыдағы шіркеуден басталып, сонымен аяқталатынына, 70 пайы­зы мұсылмандар болып табылатын Қазақстан туралы ақпарат осы­лай­ша беріліп жататынына наразы­лы­ғын жасырмады. Ал Арал тұзы проб­лемасын көтерген Мұрат Әбе­нов осы орайда Үкімет назарын қазіргі таңда Қазақстан рыногын арзан ресейлік тұздың жаулап ал­ғаны жөнсіз жәйт екеніне аударды. Оның айтуынша, ресейлік тұз өндірушілерге мемлекет тарапынан қолдау болғандықтан, олардың тауарлары өтімді. Қазақстан Үкіметі мен Қыр­ғыз­стан Үкіметі арасындағы екі ел елшіліктері қажеттері үшін Астана мен Бішкек қалаларында ғимарат­тар мен жер учаскелерін өтемсіз пайдалануға өзара беру туралы келісімді ратификациялау туралы заң жобасын қара­ған депутаттар оны қолдау керек деп шешті. Диплома­тиялық қалашық аумағындағы 556 шаршы метр ғима­рат пен 0,247 гектар жер қыр­ғыздарға 49 жылдық жалмен өтемсіз берілсе, Бішкектегі 532 шаршы метр­лік ғимарат пен 0,17 гектар жер учаскесі Қазақстанға осындай шартпен берілетін болып келісілген. Тағы бір халықаралық құжат – Венада 1968 жылғы 8 қарашада қол қою үшін ашық Жол белгілері мен сигналдары туралы конвен­цияны толықтыратын Еуропалық келісімді ратификациялау туралы заң жобасы мен осы жобаға жапсарлас Жол таңбалары туралы хат­та­маны ратификациялау туралы заң жобасын да депутаттар бір­ауыз­дан қолдады. Келісімде белгіленген жүйеге сәйкес келмейтін барлық сигналдық белгілер, белгілеулер, құрылғылар мен таңбалар Келісім күшіне енген күннен бастап он жыл ішінде ауыстырылуы тиіс. Ішкі істер министрінің орын­басары Амантай Күреңбековтің мәлімдеуінше, Қазақстан өз белгілерін 90-шы жылдары-ақ ауыс­тырып тастаған, сондықтан қосымша қаржыны талап етпейді. Сондай-ақ 2009 жылғы 11 жел­тоқ­сандағы Кеден одағының ве­те­ринарлық-санитарлық шаралар жө­нін­дегі келісіміне өзгерістер енгізу туралы хаттаманы ратифи­ка­циялауға қатысты заң жобасы да мақұл­данғанын айта кету керек. Бұл жерде мәселе тауарларды өндіруді, өңдеуді және сақтауды жүзеге асыратын ұйымдар мен адамдарға бірлескен тексерістер (инспекциялар) жүргізе алу құқы берілетіндігінде болып отыр. Сонымен бірге, өзге елдің уәкілетті органдары бір-біріне сенім білдіру арқылы өздері тексеру жүргізе беретін норма да заңдық құжатта қарастырылыпты. Асқар ТҰРАПБАЙҰЛЫ.