«Динамо» бірінші рет жоғары лигадан түсіп қалды

АСТАНА. 21 мамыр. Бүгін футболдан Мәскеудің «Динамо» командасының премьер-лигадан шығып қалғаны белгілі болды. Бұл туралы Р-Спорт ақпарына сүйенген egemen.kz хабарлады. «Динамо» Ресей чемпионатының соңғы, 30-турында Мәскеу түбіндегі Химки қаласының стадионында Санкт-Петербургтің «Зенитін» қабылдап, 0:3 есебімен жеңілді. Биыл чемпионатта қола жүлдегер атанып отырған жеңімпаздар сапынан Артем Дзюба (59-минут), Александр Кокорин (62) және Доменико Кришито (90, пенальти) мергендіктерімен көзге түсті. Осы жеңіліс команданың жоғары дивизионда қалу-қалмау жөніндегі тағдырын да шешіп кетті. Сөйтіп, 30 ойыннан 25 ұпай ғана жинаған команда 15-орынға тұрақтады. Осы белдеу енді оны жоғары эшалонмен қоштасуға мәжбүр етті. Сонау кеңес заманына бері тек жоғары топта өнер көрсетіп келе жатқан клуб осылайша өзінің 93 жылдық тарихында бірінші рет жоғары бірінші лигада ойнайтын дәрежеге жетті. Ресей чемпионатының премьер-лигасынан мәскеуліктермен бірге соңғы, 16-орындағы «Мордовия» да түсіп қалды. Ол бүгін Мәскеуде жергілікті «Локомотивтен» 0:3 болып тізе бүкті. Чемпионат қорытындысында Мәскеудің ЦСКА командасы бесінші рет чемпиондық атаққа қол жеткізді. Ол 2003, 2005, 2006, 2013, 2014 және 2016 жылдары алтын жүлдегер атанды. Ал ең титулы көп команда атағы «Спартакта» қалып тұр. Ол 9 мәрте біріншілікте топ жарған болатын. Екінші орынға соңғы турда Грозныйдың «Терегін» 2:0 етіп ұтқан Дондағы Ростовтың «Ростовы» орналасты. Өткен жылдың соңында премьер-лигадан шығып қалғалы тұрған бұл команданы белгілі футбол маманы Құрбан Бердыев бір жылдың ішінде чемпиондыққа таласатын ұжым етіп шығарды. Талғат Райымбек. Дерек. Фото: Р-Спорт.