Алматы және Азиада
Алматы қаласының әкімі Ахметжан Есімовпен әңгіме
– Құрметті Ахметжан Смағұлұлы, Азиада кезінде көптеген шетелдік мәртебелі меймандар келейін деп отыр ғой. Соларға ару қала Алматымызды қалай сипаттап таныстырар едіңіз? Бүгінгі Алматы дегеніміз не, өзіндік дара қасиеттері және ел өміріндегі мән-маңызы қандай? – Ең алдымен, біздің Алматымыз Алатаудың баурайын жайлаған әлемнің аса көрікті қалаларының бірі. Сан алуан сұлу табиғат аясы мен туристік маршруттар оның тартымдылығын арттыра түскен. Өткен жылы дүние жүзінің урбанистика саласындағы жетекші ғалымдары шаһарымыздың мың жылдығын айғақтаған қарар қабылдады. Қаланың көз тартар көрікті орындарының қатарында VІІ Қысқы Азия ойындары өтетін бірегей спорт кешендері – биік таулы «Медеу» мұз айдыны мен «Шымбұлақ» тау шаңғысы курортын алдымен айтар едік. Мемлекет басшысы Нұрсұлтан Назарбаев Алматыны ел тәуелсіздігінің бесігі деп атады. Алматы тәуелсіз Қазақстанның тұңғыш астанасы. Бүгінде ару қала елдің қоғамдық-саяси және мәдени өмірінің орталығы болып қалып отыр. – VІІ Қысқы Азия ойындарын Алматыда өткізу жөнінде шешім қабылдауға ықпал еткен негізгі себептерді айтып өтсеңіз? – «Медеу» және «Шымбұлақ» сияқты бірегей спорттық нысандарын және табиғи-рекреациялық әлеуетін ескере отырып Азиаданы өткізу құрметі әуел баста Алматы қаласына тиген болатын. Әрине, бұл ретте мегаполистің халықаралық стандарттарға сай келетін дамыған инфрақұрылымы аз рөл атқармағаны анық. Алматыда Азия ойындарын өткізу мақсатында халықаралық федерация әлемдегі ең таңдаулының бірі деп таныған орасан зор шаңғымен тұғырдан секіру кешені, шаңғы және биатлон стадиондары салынды, сондай-ақ Балуан Шолақ атындағы Спорт сарайы, Алматының інжу-маржаны – «Медеу» мұз айдыны және жер-жаһанға танымал «Шымбұлақ» тау шаңғысы курорты бастан-аяқ танымастай жаңартылды. Келешекте «Шымбұлағымыз» әлемнің аса ірі тау шаңғысы курорттарының алғашқы ондығына кірмек, ал Алматы қаласы әлемдік деңгейдегі сервисі бар, сегіз қиыр шартараптан туристер қабылдауға қабілетті Орталық Азиядағы бірден-бір орын болмақ. Элита-санатты Mariot, Holiday Inn, Radisson, Rixos, SAS Medeu, Kempinski Bayterek, Tulip сынды қонақ үйлердің, сондай-ақ көлік және тұрғын үй инфрақұрылымы нысандарының болуы, бұған қоса ұтымды жағрапиялық орналасуы мегаполисті аса ірі транзиттік торапқа, тоқсан тараудың тоғысына айналдыра алмақ. Кейінірек Азиаданы елордада да өткізу жөнінде шешім қабылданды. Бұған Астанада республикалық велотрек, конькимен жүгіретін жабық стадион және басқалары сынды бірқатар нысандардың болуы әсер етті. Әрине, оларды Алматыда қайтадан салу қисынға келмейтін. – Спорттық нысандарды салумен және жаңалаумен қандай компаниялар айналысты? Осыншалықты қыруар жұмысқа қанша қаржы жұмсалды? – Алматыдағы спорттық нысандар мемлекет пен инвесторлардың қолдауы арқасында қаланың өзінің, республиканың Туризм және спорт министрлігінің күшімен салынып, жаңаланды. К-125, К-95 халықаралық шаңғымен тұғырдан секіру кешені – қыс пен жазда бірдей жұмыс істейтін әлеуметтік-мәдени мәндегі бірегей құрылыс. Оның 5500 көрермен орындық мінберлі және кешеннің батыс беткейіндегі террасалы осызамандық көпсалалы ғимараты, сондай-ақ заманауи медиа-орталығы бар. Әлемде нақ осындай тұғырдан секіру кешендері бірнешеу ғана. Бірақ біздің кешеннің бір өзгешелігі сонда, ол 125 және 95 метрлік екі секіру тұғырының басын қосқан. Шаңғымен тұғырдан секіру кешенін халықаралық беделді сарапшылар мен спорт өкілдері техникалық сипаттамалары, сәулеті және табиғи жағдайлары бойынша әлемдегі ең таңдаулының бірі деп таныды. Құрылысқа тапсырыс берген Алматы қаласының құрылыс басқармасы. Мердігері «Төлқұрылыс» ЖШС, жобалаушысы «Данстрой» АҚ болды. Жоба құны 22 млрд. теңгеге тең. Биік таулы «Медеу» спорттық кешенінде аса заманауи автоматты тоңазытқыш жабдық, табло орнатылды. Дабыл белгісі, ақпараттандыру және қауіпсіздік жүйелері жаңартылды, көше жарығын және жарыс кезіндегі арнайы прожекторларды энергиямен қамту жөнінде ауқымды жұмыстар атқарылды. Мұндағы пластик отырғыштар ағаш отырғыштармен ауыстырылды, мінбер астындағы орынжайлар жөнделді. Нысанның энергиямен жабдықталуы жаңадан салынған «Медеу» кіші стансасына қосылды. Қоғамдық орынжайлар, соның ішінде баспасөз орталығы, көпшілік сырғанақ тебу дәлізжайы, мұражай, спортшылардың киім ауыстыратын орны, дәрігерлік көмек орталығы, спортшылар мен келушілер тынығатын бөлме жаңартылды. Сондай-ақ, кешен аумағы абаттандырылды. Алаң өңірлік және халықаралық деңгейдегі спорттық шараларды, конькимен жүгіру, бенди, хоккей бойынша жаттығулар өткізуге әбден лайықталды. Жобаның жалпы құны 10,2 млрд. теңгені құрады. Осы орайда қала құрылыс басқармасының тапсырысын «Риан Инжиниринг» ЖШС орындады. Азиада қарсаңында инвестор «Капитал Партнерс» ЖШС «Медеу-Шымбұлақ» тау шаңғысы курорты жөніндегі аса ірі тағы бір жобаны аяқтады. Бұл арадағы мердігер – «Шымбұлақ девелопмент» ЖШС. Енді төмендегі «Медеу» бекетінен «Шымбұлақта» орналасқан аспалы жолдың жоғарғы нүктесіне жайлы кабинамен 20 минөтте жетуге болады. Бұл ұзындығы жөнінен әлемдегі екінші аспалы жол. Оның жалпы ұзындығы төрт жарым шақырым. 114 кабинамен 8 жолаушыдан отырып сағатына екі мың адамға дейін тасымалданады. Осы керемет аспалы жол құрылысына 10,4 млрд.теңге жұмсалды. Тынығушыларға ыңғайлы болу үшін аспалы жолдың басында 150 және 850 орындық жер асты және жер бетіндегі автотұрақтар жасалды. «Шымбұлақта» көрермендер үшін мінбер тұрғызылып, беткейлерді жасанды қарландыруға дайындау жөніндегі жұмыстар жүргізілді. Мұнда Азиада шеңберінде шаңғымен құлдилау және слалом-гигант бойынша жарыстар өтеді. Бұл дегеніңіз, Азиаданың маңызды нысаны ғана емес, сонымен бірге Алматыдағы туризмді дамытуға арналған, абыройымызды асқақтата түсер жоба. Бұл әлемдік стандарттар деңгейінде қызмет көрсететін Орталық Азиядағы бірден-бір орын. Балуан Шолақ атындағы Спорт сарайының бірінші кезегі аяқталды. Жаңалағаннан кейін Сарайдың сыйымдылығы 4500 адамға дейін ұлғайды. Сарай аренасы әмбебап. Спорттың мұз айдынындағы түрлерінен бөлек, мұнда басқа да әралуан жарыстар өткізілетін болады. Осыған орай ақпараттық табло, әлсіз токты инженерлік байланыс жүйелері, сондай-ақ хабарлау мен қауіпсіздіктің соңғы жүйелері орнатылған. Жобалық құны 14,3 млрд. теңгені құраған жұмыстарды Туризм және спорт министрлігінің тапсырысы бойынша «СЭФ» компаниясы орындап шықты. Қазіргі уақытта жобаның екінші кезегі – жаттығу стадионы мен жер асты автотұрағының құрылысы жалғасуда. Балуан ата сарайында Азиаданың әйелдер шайбалы хоккейінен жарыстар өтпекші. Біз сондай-ақ Алматы облысының Талғар ауданындағы шаңғы-биатлон стадионындағы және «Табаған» шұратындағы фристайлдан жарыс өтетін стадионның құрылыс жұмыстарының барысын мұқият қадағалап отырдық. Шаңғы және биатлон стадиондары кешені бойынша Туризм және спорт министрлігінің тапсырысын «СМП Алматы» ЖШС орындады. Жобаның жалпы құны 13,1 млрд. теңге. Мұнда шаңғымен спорттық бағдарлаудан, биатлоннан және шаңғымен жүгіруден жарыстар өтеді. «Табаған» спорттық-сауық кешенінде халықаралық шаңғы спорты федерациясының техникалық делегаттары тексеріс өткізіп, онда фристайл жарыстарын өткізуге сәйкестік жөніндегі сертификатты табыс етті. – Қазақ атамыз: «Келгенше қонақ ұялады, келген соң үй иесі ұялады» дейді. Спортшылар мен қонақтарды орналастыру, күту орайында қандай дайындықтар жасалды? «Мәдени Азиада» жөнінде кеңірек білсек деп едік? Қауіпсіздік, медициналық қызмет дәрежесі қандай болмақ? – Қала Азиадаға қатысушылар мен қонақтарды қарсы алуға дайын. Спорт нысандары халықаралық сарапшылардың жоғары бағасын алды. Әрине, қауіпсіздікті қамтамасыз ету және қажет жағдайда кәсіби медициналық көмек көрсету Азиада күндеріндегі шұғыл міндеттердің қатарына жатады. Біз Азиада жұмысына жегілген қаланың барлық көмекші құрылымдарында тексеріс өткіздік. Азиадаға қатысушылар мен қонақтар тұратын орындарды қоса, спорт нысандарында оқу-жаттығулар ұйымдастырылды. ҰҚК лаңкестікке қарсы орталығы қалалық жедел штабымен өзара байланыс жолға қойылды. Азиада ойындары қарсаңында әрі өтетін уақытында қаланың азаматтық қорғаныс және төтенше жағдай қызметтері күшейтілген жұмыс тәртібіне көшірілді. Жарыстардың барлық нысандарында медициналық пункттер үшін барлық талаптарға сай орынжайлар бөлінді. Азиада кезінде іске қосылған барлық медициналық мекемелер қазақ, ағылшын, орыс тілдеріндегі навигациялық маңдайшалармен жабдықталды. Зардап шеккендерді жылдам алып кететін көшіру жоспары әзірленді. Осы мақсаттарда медициналық жедел жәрдем автомобильдері қосымша сатып алынып, олар не қажеттің бәрімен қамтамасыз етілді. Сондай-ақ, Төтенше жағдай министрлігінің бортында медициналық қызметкері бар әуе авиациясын пайдалану жоспарланған. Бірінші ақпанда басталатын «Мәдени Азиада» бағдарламасы біздің ғажайып қаламыздың қонақтарына Қазақстанның қазіргі мәдениетінің барша қырымен танысуға және жақсы тынығуға мүмкіндік беретіндей етіп әзірленген. Қазақстандық белгілі өнер шеберлері, танымал әртістер халықтық, классикалық, джаз және осызамандық музыка орындаушыларының қатысуымен өтетін бірқатар концерттік бағдарламалар «Алматы – мәдени астана» акциясы аясында ұсынылмақ. Алматы мұражайларында Қазақстанның бейнелеу және қолданбалы өнерінің жәрмеңке-көрмелері өтеді. Сондай-ақ біздің мәдениет басқармамыз кино өнерінің әуесқойларына «Киноазиада-2011» қызғылықты бағдарламасын, жастар үшін ашық аспан астындағы «ALMATY WINTER DANCE» атты қалалық би думанын, «Азиада аруы – 2011» байқауын әзірледі. «Медеуде» «Қарлы Барыс саябағы» қанат жайып, қала қонақтары мен балаларын ерткен алматылықтардың спорттық рухын және белсенді демалысын қанаттандыратын тақырыптық алаңға айналмақ. 2011 жылғы VІІ Қысқы Азия ойындарының ресми жабылу салтанаты 6 ақпан күні Алматыда, Балуан Шолақ атындағы Спорт сарайында өтеді. Сағат 17-де басталатын осынау думанды бағдарлама, театрландырылған көріністер, жарқылдаған отшашулар, ойындарға қатысқан командалардың шеруі және ресми өкілдердің сөздері жарқын оқиға болмақ. Бұл тарихи сәттерді теледидардың тікелей хабарынан, сондай-ақ «Медеу» спорттық кешенінде орнатылған LED дисплейлерінен тамашалауға болады. Кіруі еркін. Дәстүрге сай, 2011 жылғы Азия ойындарының жабылуы құрметіне салтанат аяқталғаннан кейін халықаралық шаңғымен секіру тұғырлары кешенінде мерекелік отшашу атылады. – Азиада Алматыға не береді, қандай үлгілі із, тағылым-ғибрат қалдырады деп ойлайсыз? – Азиада ару қаламыз үшін асулы белес, жарқын оқиға. Соның арқасында Алматы үлкен спорттың ғана емес, жаһандық деңгейдегі мегаполис ретінде әлемдік қоғамдастық тарихына да енеді. Осы жайды шетелдік сарапшылар да айғақтап айтып жатыр. Азия ойындарының Алматы қаласында өтуінде бірден-бір ерен еңбек Елбасыныкі. Ғаламдық қаржы дағдарысының қиын кезеңінде Мемлекет басшысы елдің іскерлік, қаржы, мәдени һәм тарихи орталығын одан әрі дамыту үшін спорт нысандарын салу мен жаңалауды аяқтау орайында маңызды батыл шешім қабылдаған еді. Сөйтіп біз Президенттің тікелей тапсырмаларын орындадық. Барлық жұмыстар мерзімінде әрі сапалы атқарылды. Мемлекет бөлген қаржы мақсаткерлікпен әрі тиімді пайдаланылды. Қысқы Азия ойындарының Алматыда өткізілуі қаланың туристік орталық ретінде дамуы орайында да үлкен маңызы бар. Бұл дегеніңіз небәрі бірнеше күнде жұлдыздай ағып өте шықса да, замандастардың, жас ұрпақтың жадында жарқын із қалдыратын абыройлы іс-шара. Бұдан соң барлық әлемдік талаптарға сай келетін, жаңаланған спорт нысандары алматылықтардың игілігіне қызмет етпек. Алатау баурайындағы ордалы шаһарымыз ірі спорт орталығына айналады. Сол арқылы біз өз қаламызда халықаралық туризмді дамытып, бұқаралық спортты кеңінен қанат жайғызып өрістету үшін қажетті алғышарттар жасаймыз. Осы ретте елдегі барлық туристік фирмалардың тең жартысы Алматыда екендігін, Қазақстанға келген әрбір бесінші турист ару қаламыздың қонағы болатынын айта кеткеніміз орынды. Әңгімелескен Қорғанбек АМАНЖОЛ, Алматы. Суреттерді түсірген Берсінбек СӘРСЕНОВ.Астана алауы
Азиада – төрлет Қазақ төріне, Туды көтер қазағымның көгіне, Бақыт болып келдің туған жеріме, Қуаныш боп ендің бүгін Еліме! Ұл-қыздарым танытатын ерлігін, Спорт тойын тойлай-тұғын келді Күн, Алау оты Алматыдан басталып, Астанама келіп жеттің сен бүгін! Алау оты – даламызға жетті кең, Халқымызға қуат берер от білем. Спорт десе туған Елім бұдан соң, Ішкен асын жерге қояр деп білем. Тұңғыш елім бұл бір іске жан салды, Алатау мен кең даламыз тамсанды. Азиада алау отын осынау, Елбасымыз бастап бүгін қарсы алды. Бұрын халқым қасіретті көп көрді, Бодан болып көз жасын да төккен-ді. Алау оты қазақ жұртын аралап, Сөнбей-тұғын жүректерге от берді. Керуен-сапар ұлы көшпен көшкенмін, Тілегі бір талай жолда дос көрдім. Азиада алау оты алаулап, Алматыдан – Астанама қош келдің! Елді аралап отпен жүзді ақжелкен, Азиада – баяны мол бақ көркем. Батыс, Шығыс, Солтүстік пен Оңтүстік, Төрт құбылам Алау отын жақты өлкем! Көкке атылып Барыс сынды пырағы, Біз қуандық жанып көздің шырағы, Енді Қазақ жүрегінде мәңгілік, Алау оты мәңгі жанып тұрады. Мыңнан – тұлпар, Жүзден жүйрік жарып бір, Қуаныштан қолын соғып халық тұр. Азиада алау оты лапылдап, Әрбір Қазақ жүрегі боп жанып тұр!.. Шөмішбай САРИЕВ, Қазақстанның еңбек сіңірген қайраткері.Алау Астанаға асты
Оны кеше қарағандылықтар мен теміртаулықтар салтанатпен шығарып салды
Бұл күнді қарағандылықтар тағатсыздана күткен еді. Елдің басты қалалары тұрғындары қошеметпен қарсы алып, шығарып салып, Астанаға табан тірер сәттегі Азиада алауын өздері де көріп қалу мүмкіндігі қуантқан болатын. Кеше көше-көшелерге шыққан алау ұстаушыларды қол шапалақтап ұзатып салушы қарақұрым жұртқа солай болды да. Соның алдындағы кешкісінде Қазақстан халық банкінің филиалында сақталып, Тәуелсіздік ескерткіші түбінде тұтанған алауды облыс әкімінің орынбасары Арман Қырықбаев тұтатып, қала әкімі Бауыржан Әбдішевтің қолына табыс етті. Ол оны межелі жерге жеткізген бетте әйгілі боксшы Серік Сәпиев жалындаған алауды жоғары көтеріп шеруді одан әрі жалғастырды. Қаланың жаңа орталығына айналып келе жатқан Оңтүстік-Шығыс аймағынан «Шахтер» стадионына дейінгі басты көшелерді бойлай желіп өткен алау ұстаушылар арасында 1972 жылғы Мюнхен Олимпиадасына қатысушы велосипедші Анатолий Степаненко, қазақ боксының саңлағы Серік Нұрқазов, белгілі ғалым, ҰҒА академигі Серғазы Әдекенов, алыс қашықтықтарға жүгіруші желаяқ Павел Сиротин, облыстық мәслихаттың депутаты Ерлан Досмағамбетов сынды азаматтар болды. Жалпы, алауды көтеру құрметі 60 адамға тиді. Эстафетаға қатысуға 16 жастағы жеткіншектен бастап 75-тегі қартқа дейін қамтылды. Солардың ішінен өнер жұлдыздары Қарақат Әбділдина мен Мақпал Жүнісованы жазбай таныған жұрт екеуіне ризалықпен қол соқты. Олар сонымен қатар осынау оқиға құрметіне әннен шашу шашып, жерлестерін екі қуантты. Шерудің бірінші кезеңі түйіскен Нүркен Әбдіров атындағы спорт сарайы алдында екі сағатқа жуық үзіліс жасалып, ол содан соң Бұқар жырау көшесі бойымен Теміртауға шыға беріске қарай жалғастырылды. Ал бұл уақытта жиналғандар театрландырылған қойылымды қызықтады. Теміртау демекші, 12 шақырымды қамтыған эстафетаның үшінші кезеңін металлургтер шаһары іліп әкетті. Қарағандылықтар қолындағы алауды бокс тарланы Тайлан Топаев теміртаулықтарға табыс етті. Онда қолдан-қолға жоғары көтерілген алау Металлугтер мәдениет сарайының алдына жеткізіліп, оны осы тұста тосып тұрған қалың қауым сүйсіне тамашалады. Алау Астанаға шығарып салынды. Айқын НЕСІПБАЙ, Қарағанды.Байланыс: №1 дайындық
Таяу күндері Азия ойындарының ресми ұялы байланыс операторы – GSM Қазақстан/Kcell оңтүстік астана журналистері үшін арнайы пресс-тур ұйымдастырып, Азиадаға қатысушылар мен қонақтарды байланыс және ұялы интернетпен қамтамасыз етудің жай-жапсарынан хабардар етті. Компания мамандары журналистерге Медеу мұз айдынында, Халықаралық тұғырдан секіру кешенінде, сондай-ақ биатлон алаңында орнатылған құрал-жабдықтарды көрсетті. Пресс-турға қатысушылар байланыс сапасын сол арада тексеріп көруге мүмкіндік алып, бейне-қоңыраулар шалудың, ұялы интернеттің жылдамдығын байқады. Ұялы байланыс сапасы – Азиаданы техникалық тұрғыдан қамтамасыз етудің ең маңызды бөлігі. Жарыс барысында әлемдік стандартқа сай жоғары сапалы байланыс жұмыс істеп тұру үшін GSM Қазақстан/Kcell Астана мен Алматы қалаларындағы Азиада нысандарында қосымша 62 базалық станса орнатқан. Бұл желілердің сыйымдылығын арттырып, ойындар жүріп жатқан кезде байланыстың шарықтау салмағын көтере алады. Айнаш ЕСАЛИ, Алматы.Біз оларға сенеміз
Еліміз құрама командасының денін құрайтын Кенді Алтайдың қысқы спорт түрлері бойынша саңлақтары Азиадада қалай өнер көрсетпек? Елімізге медальдарды барынша көбірек беретін шаңғышылар, биатлон, фристайл, тау шаңғысы, шаңғымен бағдарлау спорт түрлері бойынша шығыстың 18 ұл-қызы Алматы мен Астанада өтетін дүбірлі жарыста бағын сынамақ. Ал шайбалы хоккейден қыздар арасындағы жарыста Д.Обыденнова, А.Орлова, А.Фукс, М.Топкаева, допты хоккейден (бенди) А.Ларионов сынды жерлестеріміз ел құрамасына барынша көбірек медаль әперу үшін күш салмақ. Ал шайбалы хоккейден «Барыс» командасы сапында өнер көрсететін жерлестеріміздің де аз еместігін ескерсек, шығыс сайыпқырандарының жерге қаратпасына сенімдіміз. Хош, енді Азия ойындарында кімге сенім артамыз? Биылғы сәуірде 24-ке толатын Алексей Полтораниннің жұлдызды сәті әлі алда дегіміз келеді. Неге? 11 жасынан шаңғы спортына бауыр басқан осынау жігерлі де қайсар жігіт бас-аяғы 13 жылда дүбірлі жарыстарда адам сенгісіз табыстарға жетті. Сын сәтте сүрініп кетіп, Ванкуверде өткен Қысқы Ақ Олимпиадада қолда тұрған қола медальдан айырылып қалған Алексей сол өкініштің орнын толтырып, өткен жылдың 11-16-шы желтоқсанында Швейцарияның Давос қаласында өткен Әлем кубогының кезекті кезеңінде 15 шақырымға классикалық үлгіде жүгіруде айды аспанға шығарып, талай жампоздарды шаң қаптырып, алтыннан алқа тақты. Содан кейін қысқа қашықтықта екінші орынды иеленді. 2004-2010 жылдар аралығында Алексейіміз сан мәрте халықаралық жарыстарда еліміздің намысын қорғап, абырой биігінен көріне білді. Ендеше атақты шаңғышы Владимир Смирновтың табысын қайталай алатын Алексей Полторанин десек, қателесе қоймаспыз. Оның үстіне облыс әкімі Б. Сапарбаев талабы таудай шаңғышыға қаланың көрікті жерінен үш бөлмелі пәтердің кілтін табыс етіп, басқа да жағдайларды жасап отыр. Елімізде соңғы жылдары алға басқан тағы бір спорт түрі – фристайлден Дмитрий Рейхерд, Юлия Галышева, Юлия Родионова, Дмитрий Бармашов могулда және жұптасып өнер көрсетпек. Қазақстан құрамасы сапында Азия ойындарында сынға түсетін осы төрт қыз-жігіттен үлкен үміт күтеміз. Шаңғымен жүйіткіген кезде соңдарынан аппақ боран ұйытқып, алға қарай құстай самғаған ұл-қыздарымыз Қазақстан құрамасына медальдардың денін әпере ме деген үміт бар. Еліміз құрамасы сапындағы тәжірибелі шаңғышылардың бірі – Сергей Черепанов. Ол қазір кемел шағында – 25 жаста. Екі бірдей Олимпия ойындарына қатысып, мол тәжірибе жинақтаған Сергейдің әкесі, бапкері П.Черепановты Риддердегі спорттағы дарынды балаларға арналған мектеп-интернатта жолықтырған едік. Шаңғышының бапкері Сергейдің Азиадада төрт бірдей қашықтықта, атап айтқанда, 10, 15, 30 және 4х10 шақырымдық эстафетада жүгіретінін тілге тиек еткен еді. Міне, сол төрт сайыста кем дегенде үш медаль алу ойда бар деді бапкер әкесі. Еліміздің намысын ұзақ жылдар бойы абыроймен қорғап келе жатқан С.Малахова, Е.Коломина, О.Яцкая, А.Слоновадан да түрлі деңгейдегі алқаларды күтетінімізді несін жасырайық. Себебі, бұл жолғы Азиаданың орны бөлек. Бұдан бұрынғы жоғарғы жетістігіміз командалық есепте екінші орын болса, енді өз жерімізде көш бастап жатсақ, айып емес шығар. Жоғарыда аты аталғандар алғашқы орындар үшін күш салатыны сөзсіз. Еліміздің солтүстігінен өнер көрсететін Николай Чеботько мен Евгений Кошевой Туриннің Праджелато План жарыс алаңында спринттен сәтті өнер көрсетіп, алғашқы алтылыққа енгенін өз көзімізбен көргенбіз. Басқа жігіттер де ел намысын абыроймен қорғайды деген ниеттеміз. Шығыстың құралайды көзге атқан мерген әрі шаңғымен желмен жарысқан биатлоншы ұл-қыздары Сергей Наумик, Ян Савицкий, Ольга Полторанина, Инна Можевитина, Олимпиада чемпионы Елена Хрусталева сияқты жүлде іліп түсу үшін бар күш-жігерлерін жұмсайды деген ойдамыз. Аты аталған биатлоншылардың барлығы тәжірибелі бапкер М.Дудченконың қарамағында жаттығады. Биатлоншы ұл-қыздардан кем дегенде бес-алты медаль күтеміз. Тау шаңғысынан тәжірибелі Игорь Закурдаевтың алдыңғы орындардың бірін алатынына сенімдіміз. Ал шаңғымен бағдарлау жарысында В.Лиличенко, А.Бабенко, Е.Кузьмина да алдыңғы орындар үшін күреспек. Азия ойындары елдігімізге сын. Шығыс Қазақстан облыстық туризм және спорт басқармасының бастығы, кикбокстан әлемнің бес дүркін чемпионы Асқар Можанов Кенді Алтай саңлақтарының Азия ойындарында кем дегенде 15 медаль алулары үшін барлық мүмкіндіктерін жұмсайтынын тілге тиек етеді. Спортшыларға барлық жағдай жасалынған, қаржы, киім жағынан проблема жоқ. Олардың шетелдерде жаттығуларына да мол қаржы бөлініп отыр. Оңдасын ЕЛУБАЙ, Шығыс Қазақстан облысы. Суреттерде: солдан оңға қарай – Юлия Галышева, Светлана Малахова, Алексей Полторанин, Дмитрий Рейхерд, Сергей Черепанов.Ойындар басталып та кетті
«Басыңнан асып секіре алмайсың» деген қанатты сөз рас екен. Азиаданың екінші ойынын өткізген Оңтүстік Кореяның шайбалы хоккейден әйелдер құрамасының Жапония құрамасына айтарлықтай қарсылық көрсете алмайтындығы алғашқы минөттерде-ақ белгілі болған. Мұз айдынындағы майданның өтін көбірек көрген жапон әйелдер құрамасының ойыны солтүстікамерикалықтардың нөпір шабуылын еске салады. Шеберліктері жоғары, техникалық және жылдамдық жағынан әріптестерін қозыкөш орап өтеді. Алғашқы гол 1 минөт 32 секөндте соғылды. Алдында ғана 11-нөмірлі Юри Адачи Оңтүстік Корея қақпасының алдында қарбалас туғызған. Корей қақпашысы шайбаны жандәрмен қағып үлгерген. Жемтік көрген шәулідей түйілген Адачи қанағаттанбады. Накамураға әдемі пас шығарып берді. Гол. Алғашқы гол! Осыдан кейін-ақ корей қақпасының тығыны ағытылды. Шимузавие қақпа алдынан 4-5 метр жерден ұрған. Қақпашы қайтарып үлгерді. Қақпа түбіне шайба ілген Хирано мұз үстімен зырқыратып қуған күйі Шимузавиенің алдына тағы да салып берді. Сәл шалқая бере ұрды. Шин қаққандай-ақ қаққан. Болмады. Мұз үстімен сырғанаған шайба еніп кетті. Бұдан соң Егучи мен Хирано бір-бірден шайба соқты. Бірінші кезең 4:0 есебімен жапондар пайдасына жазылды. Ал, корейлер жапондар қақпасына жақындай алмады. Екінші, үшінші кезеңдер де жапондардың шабуылымен өтті. Сол қанат пен оң қанаттағы шабуылшылар корей қорғаушыларына ес жиғызбай, қыспаққа алды. Есеп – 10:0. Кешкі сағат 19:00-де айдынға Қазақстан құрамасы мен Солтүстік Корея құрамасы шықты. Айнаш Раушанова бастаған Қазақстан қыздары Азия ойындарының фавориті саналады. Олимпиялық жүйемен өтіп жатқан ойындар алтынға Қазақстан мен Жапония құрамасының таласатындығы әзірден айтылып жатыр. Корей қыздарымен өткен кездесуде қазақ командасы 3:0 есебімен жеңіске жетті. Балуан Шолақ атындағы спорт сарайында өтіп жатқан жарысқа жанкүйерлер көп келді. Сонау жапон, корей елдерінен арнайы келіп, сүйікті командасына жақ тартып отырған жанкүйерлердің отаншылдығы сүйсінтеді. Қазақстан мен Солтүстік Корея құрамасының арасындағы тартыста жерлестеріміздің мерейі үстем болды. Тартыс енді қызып келеді. Бақтияр ТАЙЖАН.Сәби есімі – Азиада
VІІ Қысқы Азия ойындарының алауы жағылар кезге де санаулы күндер қалды. Олимпиада, Азия ойындары мен әлем, Еуропа чемпионаттарында топ жарған еліміздің даңқты спортшыларының өз туған жерінде бағын сынар кез де келді. Туған жердің төрінде Қазақстанның көк байрағы жиі желбіресе дейміз. Үкілі үмітіміздің шырағы сөнбесін. Барша халқымыздың алақанында әлди көріп, жүрегінде жұпарға бөленген жерлестеріміздің мерейі үстем болғай! Әрине, спорттың атты спорт. Жеңіс бар, жеңіліс бар. Түбі қайыр! Біздің осы тілегімізге Жайықтың жағасындағы Қарауылтөбеде дүниеге келген Азиада есімді бүлдіршін қыз да өз үмітін қосады. Дәл спорт мерекесі Астанада басталар күні оған да өмірге келгеніне 65 күн болады. Иә, сәби тілегі қабыл болғай! Әжесі Раиса, ата-анасы Бисенбай, Бибігүл Телібаевтар өзімізде өтетін Қысқы Азия ойындарының құрметіне сәбидің есімін Азиада қойыпты. Несі бар, әп-әдемі-ақ. Отбасындағы өмірге келген бесінші сәбидің есімі әлемдік спорт додасының Қазақстанда өтуі салтанатын айшықтап тұрғандай. «Қыз тілекші» дейді халқымыз. «Халық айтса, қалт айтпайды». Ақжайық ауданының әкімі А.Иманғалиев сәбиді, оның ата-анасын қызу құттықтады. Әкесі Бисенбайдың Алматыға барып «Көршілер» бағдарламасына «Қазақстан телеарнасына» түсуіне қолдау көрсетті. Елге абырой әкелер ел азаматтарының ақжолтай істері жалғасын тапса дейміз. – Сәбиіміз қалыпты өсіп келеді, болашақ ел спортының жұлдызы болсын деп есімін Азиада қойдық, – дейді анасы Бибігүл. Айтпақшы, сәбидің бөлесі Еркін Өтегенов елге танымал бола бастаған жас әнші. Демек, сәбиге де, оның барлық етжақын бауырларына да мықты денсаулық тілейміз! Қазақстанда басталар Азия ойындарында ел спортында ең үздіктер болғай! Тілес ЖАЗЫҚБАЙ, Қазақстан Журналистер одағының мүшесі. Батыс Қазақстан облысы, Ақжайық ауданы.Мұз қалашығы
Қысқы Азия ойындарының қарсаңында Астанада «Мәдени Азиада» жобасының аясында еліміздің тарихынан сыр шертетін мұз қалашығы салынып, халықтың көзайымына айналып отыр. Бұл қалашықтың құрылысына жауапты болған Азия ойындарын өткізу жөніндегі Астана қалалық дирекциясы. Осы мекеменің шақыруымен мұз қалашықты салуда өзіндік қолтаңбасы бар қытайлық «Хунтэнда» компаниясы 10 желтоқсан күні қалашықтың құрылысына кірісіп, оны жаңа жыл алдында салып бітірді. Жалпы, бұл қалашықты жай ғана мұздан тұрғызылып, жасалған қалашық деп айтуға болмайды. Оның инфрақұрылымы, өзіндік философиясы бар. Ал оның идеологиялық және этномәдени дизайнын әзірлеумен отандық екі компания айналысты. Соңғы тұжырымдамасын Астана қалалық Суретшілер одағы жасады. Осындай мамандардың шығармашылық қиялынан шыққан туынды астаналықтар мен қала қонақтарының бос уақыттарын көңілді өткізіп, ашық аспан астында қазақ елінің тарихынан сыр шертетін көне мұражай мен көрме іспеттес қалашықты тамашалай алады. Ал қытайлық мамандар болса, қалашықты салғанда өздерінің жарықтандыру құралдарын пайдаланды. Сондықтан жергілікті мамандардың айтуынша, өзіміздің идеямызды іске асыру бес есеге арзан түсті. Жалпы, қалашықтың дизайны бірнеше тарихи кезеңнен тұрады. Қалашықтың басты сырғанағы – «Алтын Орда» сахналық алаңы болса, сақтар дәуірінің мүсіндері Астанада бұған дейін болмаған технология бойынша жасалды. Енді ең басты нәрсені айтсақ. Қалашықтың ортасында Қысқы Азия ойындарының басты қазандығы алаулап тұрады. Бұл алаудың 30 қаңтар күні «Астана-Арена» стадионында жағылғаннан кейін, бас қазандықтың бос стадионда алауламай, оны көпшіліктің назарына шығару үшін жасалды.Сыры көп суреттер
Астанадағы Президенттік мәдениет орталығының көрме залында VII Қысқы Азия ойындары мен еліміз тәуелсіздігінің 20 жылдығына арналған «Қазақстан спортының тарихы» атты көрме ашылды. Көрменің мақсаты – еліміздің спорт саласында жеткен жетістіктерін өскелең ұрпаққа таныстыру, жастар арасында саламатты өмір салтын кеңінен насихаттау. Көрмеге Қазақстан спорт тарихынан мағлұмат беретін фотосуреттер мен экспонаттар, Азия ойындарының арнайы спорт киімдері, эмблемалары, кәдесый бұйымдары, сонымен бірге ұлттық, әлемдік, жалпы спорт түрлері мен ХХ ғасырдың басында өткен көптеген әлемдік жарыстардың жеңімпазы, қазақтың ең танымал спортшысы – Қажымұқан Мұңайтпасов жайлы материалдар ұсынылуда. Мұнда Кеңес одағы тұсында Олимпиадаға қатысқан тұңғыш қазақ және 1960 жылы Рим Олимпиадасының жеңіл атлетикадан күміс жүлдегері Ғұсман Қосанов, қазақтан шыққан тұңғыш Олимпиада чемпионы саналатын, 1972 жылғы Олимпиада чемпионы, баскетболшы Әлжан Жармұхамбетов, ең жарқын спорт жұлдызы – 1976 жылы Канаданың Жазғы Олимпия ойындарында гимнастикадан үш дүркін чемпион атанған Нелли Ким, 1980 жылғы Мәскеу Олимпиадасында грек-рим күресі бойынша чемпион атанған Жақсылық Үшкемпіров пен Шәміл Серіков, 1988 жылғы Сеул Олимпиадасынан жеңіспен оралған қазақстандықтар зілтемірші Анатолий Храпатый мен футболшы Евгений Яровенко туралы мәліметтерді көруге болады. Қазақстан тәуелсіздік алғаннан кейін Олимпиадаға өз атынан қатыса бастап, әр жарыс сайын отандастарымыздың жүлделі орындарға ие болып келе жатқаны белгілі. Осы оқиғаларға байланысты көрмеде 1996 жылдан осы кезге дейін Олимпия ойындарының құрмет тұғырының ең биік сатысына көтерілген спортшылар туралы деректер орын алған. Дастан КЕНЖАЛИН.Бір қақпаға... 25 шайба!
Кеше Астана уақыты бойынша сағат 13.30 бен 16.00 арасында шайбалы хоккейден Қысқы Азия ойындарының алғашқы кездесуі өтті. Бірінші болып «Қазақстан» спорт сарайының мұз айдынына шыққан Қырғызстан мен Тайланд құрамалары арасындағы матч 15:4 есебімен Алатаудың ар жағындағы ағайындардың пайдасына шешілді. Көрермендерге ең нәтижелі ойыншы ретінде төрт рет көзге түскен Азамат Шидеринов танылса, Артем Колобов хет-трик орындады. Сол күні Астанада Малайзия мен Бахрейннің ерлер хоккей командалары айдынға шықты. Матч барысында малайлықтардың мысы басым екені көзге бірден ұрып тұрды. Олар үш кезеңде Бахрейннің қақпасына 25 шайба соқты. Бірінші кезеңде 4 шайба, екінші кезеңде 8 және 13 шайбаны үшінші кезеңде соғып үлгерді. Малайзияның құрамында алты шайбаның авторы Бан Кин Локе, бесеуінің иесі Кхиа Пенг Тан болды. Ал осы күннің соңғы кездесуі Моңғолия мен Кувейт құрамаларының арасында өтті. Матч 3:2 есебімен Моңғолияның пайдасына шешілді. Дастан КЕНЖАЛИН.Волонтерлер
«Қазақ» десе қонақжайлығы бірден ойға оралатын осынау пікірді тағы да бір дәлелдеудің кезі жеткен сияқты. Азиада қонақтарын бүгінгі күні салтанатты түрде қарсы алып, қонақ үйлерге орналастырып, уақтылы тамақтандырып, ары-бері жүріп-тұру мәселелері алдын ала жоспарланған. Шетелдіктерге қызмет көрсету үшін Астананың өзінде 1500-ден астам еріктілер жұмысқа тартылған. Олардың басым көпшілігін жоғары оқу орындарында білім алып жүрген, шет тілдерін жақсы меңгерген студенттер құрайды. Жақында бізге VІІ Қысқы Азия ойындарының волонтер-үйлестірушісі Әлібек Әбу-Әлимен еріктілердің қызметі туралы шағын сұхбаттың сәті түскен еді. – Жалпы, еріктілердің міндеті не? – Қазақстанда волонтерлік қызмет тәуелсіздік алған жылдардан бастау алған. Біздің міндетіміз – Азия ойындарының идеясын халық арасында насихаттау әрі тарату, Азия елдерінің ынтымақтастығы мен дамуын және достастығын нығайту. Біз спорт жарыстарын ұйымдастыруда шақырылған елдердің делегацияларына көмек көрсетеміз. Атап айтқанда, спортшылар мен жаттықтырушыларды, сондай-ақ қонақтарды қажетті ақпаратпен қамтамасыз ету. – Волонтер қызметіне қалай келдің? – Мен осы іске «Азия ойындарын қазақ топырағында өз деңгейінде өтуі үшін қандай үлес қоссам екен?» деген ой алып келді. Алғашында, шет тілдердің көмегі көп тиді. Кейіннен, бізді іріктеуде бойымдағы ұйымдастырушылық, жауапкершілік қабілетімнің арқасында «үйлестіруші» қызметіне тағайындалдым. Осы қасиеттерім үшін алдымен бір Аллаға, одан кейін мені тәрбиелеген ата-анама алғысым шексіз. Өйткені, ата-анамның «Астанадай қалада тұрасың, Қазақстандай елдің азаматысың, елдің алдында жүріп, аянбай қызмет етуің керек!» деген сөзі мені әрдайым алға жетелеп отырады. – Үйлестіруші мен волонтердің ара салмағы неде? – Үйлестірушінің жүгі қатардағы еріктілерге қарағанда ауырлау. Алайда, мені алға жетелейтін бойымдағы елім, жерім деген патриоттық сезім. Ал, волонтер сөзін ерікті деп аударып жүрміз. Меніңше ерікті болу – еріккеннің ермегі емес. Елдің еңсесін айшықтайтын маңызды шараға атүсті қарауға болмайды. Үйлестіруші волонтер болу осы қызметте жүрген жастарды іріктеуден тұрады. Оларды іріктеу жоғары деңгейде өтті. Талап – шет тілдерін білетін жастарды жұмысқа тарту. Бұл ретте, ағылшын, қытай, араб, корей, жапон тілдеріне ерекше назар аударылды. Шет тілдерін жақсы меңгерген волонтер аудармашы қызметіне тағайындалды. Ол дегеніміз шет тілдерінде тіл тәжірибесінен өтуде таптырмас мүмкіндік. Оларды спорттық нысандар мен әуежайларда сынақтан өткіздік. Қалай десек те, Қысқы Азия ойындары түндігін түргенде қарап жататын жан болмайды. Бар жауапкершілік еріктілерге артылмақ. Себебі, Азиаданың 80 пайыздық жұмысы волонтерлерге жүктелген. – Волонтерлердің тағы қандай түрлері бар? – Азия ойындарында олар негізгі-көшбасшылық және қосалқы-командалық болып екі топтан тұратын болады. Көшбасшылардың біреуі бекітілген секторлардың мақсаттары мен міндеттеріне байланысты, 10 адамнан тұратын өз командасын құрады. Ал біз негізінен аккредитациямен айналысамыз. Бізге Үкімет тарапынан барлық жағдай жасалған. Ұйымдастырушы комитет волонтерлерге ақысыз негізде киім-кешекпен қамтамасыз етті. Жұмыс уақытында волонтерлер күніне екі рет тегін тамақтанады. Ас мәзірлері қаламыздың ең жақсы мейрамханаларында дайындалады. Іс-шаралар өтетін орындарға бару үшін тіпті көлікпен қамтамасыз етілген. Тегін байланыс қызметі берілді. Сондай-ақ, әрбір волонтерге жеке кітапшалар таратылды. Азиада волонтері ретінде оқуды жалғастыра отырып, тәжірибе жинақтауға, шетел тілдерін жазбаша ғана оқып жүрген студенттерге тәжірибе жүзінде тілді меңзеуге, көшбасшылық және командада жұмыс істеу қабілеттерін дамытуға мүмкіндік береді. Әңгімелескен Жұлдыз БАЙДІЛДА.