Түркияның жаңа премьер-министрі тағайындалды

АСТАНА. 23 мамыр. Түркияның жаңа премьер-министрі болып, Бинали Йылдырым тағайындалды. Бұл туралы lenta.ru-ға сілтеме жасаған egemen.kz тілшісі хабарлады. Кеше, яғни 22 мамыр күні билік басындағы «Әділдік пен даму» партиясының жиыны өтіп,  партия төрағасы сайланды. Бинали Йылдырым бұл орынға жалғыз үміткер болатын. Reuters агенттігінің мәліметі бойынша, оның кандидатурасын съезге келген 1470 делегаттың 1405-і қолдаған. Осыдан кейін Түркия президенті Режеп Ердоған премьер-министр болып келген Ахмет Давутоглудың отставкасын қабылдады. Түркияда аталған партияның төрағасы үкімет басшысы қызметін атқарады. Бинали Йылдырым осыған дейін елдің транспорт, теңіз көлігі және байланыс министрі болып келген. Айта кетейік, Ахмет Давутоглу 2014 жылы елдің премьер-министрі болып тағайындалған. Аян Әбдуәли. Дерек, фото: lenta.ru.