Біз қаншамыз, қандаймыз?

Қазақстан халқы 2030 жылға қарай 20 миллионға жетеді. Бұл туралы Астана экономикалық форумы ая­сындағы өсудің жа­ңа үл­гісін іздеу жолында тақыры­бындағы сессияда Денсаулық сақтау және әлеуметтік даму вице-министрі Біржан Нұрым­бетов мәлімдеді. – Демографиялық болжамдар бойынша, еңбекке қабілетті жастағы Қазақстан халқының жыл сайынғы табиғи өсімі 2017-2018 жылдары 10 мың адамға дейін төмендейді. Ал 2019 жылдан бастап өсім жоғарылай бастайды. Сонымен қатар, 2020 жылы өсім шамамен 25 мың адамға жетеді. Ал 2025 жылға қарай жыл сайынғы өсім 100 мың адамнан асады. Бұл еңбек нарығында күрделі жағдай туындатқанымен, экономикалық өсім қарқынына оң  ықпал ететін болады, – деді вице-министр. Оның айтуынша, алдағы уақытта табиғи өсім мен адам­дардың өмір сүру ұзақ­ты­ғының артуы себепті Қазақ­стан халқының жалпы саны да көбейетін болады. Жиын барысында ол Біріккен Ұлттар Ұйы­мы экономикалық және әлеуметтік істер депар­таментінің болжамды мәлі­мет­терін тілге тиек етті. Мәлімет­терге жүгінер болсақ, 2030 жы­лы Қазақ­стан халқы 14 пайызға өсіп, 20,1 миллион адамға ж­ете­тін болады. – Уақыттың осынау сын-қатеріне жауап беру үшін біз ішкі еңбек ресурстарын өнімді жұмысқа тартуды жоспарлаудамыз. Қазіргі таңда «Жұмыспен қамтудың жол картасы-2020 бағдарламасын жүзеге асырып жатырмыз», – деді ол. Айта кетейік, Ұлттық экономика министрлігі Статис­тика комитетінің хабарлауынша, Қазақстан халқының саны мамыр айының басында 17 миллион 733,1 мыңға жеткен. Аян ӘБДУӘЛИ, «Егемен Қазақстан»