Велошабандоз Нибали «Джиро д'Италия» кезеңін ұтты

АСТАНА. 28 мамыр. «Астана» велокомандасының капитаны Винченцо Нибали «Джиро д'Италия» көпкүндігінің көшін бастады. Бұл туралы vesti.kz-ке сілтеме жасаған egemen.kz тілшісі хабарлады. «Астана» командасының капитаны аталған жарыста мәреге алтыншы болып келгенімен, жалпы есебі бойынша 20-шы кезеңнен кейін суырылып алға шықты. Ол бұған дейінгі кезеңдерде көш бастап келе жатқан Orica GreenEDGE командасының спортшысы Эстебан Чавесті 52 секундқа артқа тастап кетті. Бұл кезеңде «Катюша» велошабандозы Рейн Таарамяэ жеңіске жетті. Екінші орында Дарвин Атапума (BMC Racing), үшінші – америка спортшысы Джозеф Домбровски (Cannondale) келді. Айта кетейік, ертең «Джиро д'Италия» көпкүндігінің соңғы кезеңі. Ол дәстүр бойынша «достық кезеңі» деп аталады және мәреге барлық велоспортшылар бірге келеді. Сондықтан Нибали «Джиро д'Италия» гранд-турының 2016 жылғы жеңімпаз болып отыр. Талғат Райымбек. Дерек: vesti.kz. Фото: today.kz.