Батыс Қазақстанда аудан экс-әкімі кісі өлтіруге әрекет жасаған

ОРАЛ. 28 мамыр. Батыс Қазақстан облысы, Теректі ауданының бұрынғы әкімі Жеңіс Серікқалиев кісі өлтіруге әрекет жасады деген күдікпен қамауға алынды. Бұл туралы «Мой город» порталының дерегіне сүйенген egemen.kz тілшісі хабарлады. Интернет-портал хабарлағандай, осы іс бойынша Батыс Қазақстан облысы, Теректі ауданының бұрынғы әкімі Жеңіс Серікқалиевтен басқа тағы екі адам ұсталған. Олар биылғы ақпан айында бір әйелді өлтіруге әрекет жасағандары үшін тұтқындалып отыр. Кейбір деректерге қарағанда, ол Серікқалиевтің көңілдесі көрінеді. Бірақ әйел әупіріммен тірі қалып, кейін өзінің өміріне балта шаппақ болғандардың кімдер екендерін айтып берген. Әзірге құқық қорғау органдары аталмыш оқиғаға байланысты түсіндірме бермеген. Бірақ күдіктілердің «Кісі өлтіруге әрекет ету» бабы бойынша тексеру жүріп жатқаны белгілі болды. Бүгін таңертең Батыс Қазақстан облысының әкімі Алтай Көлгінов Теректі ауданының активіне ауданның жаңа әкімі Мұрат Мұқаевты таныстырды. Сол кезде ауданды 2013 жылдан басқарып келген Жеңіс Серікқалиевтің өз өтініші бойынша қызметінен босағаны белгілі болды. Темір Құсайын. Дерек: Мой город.