Түсіністік тамыры тереңде

Кеше Ақордада Мемлекеттік хатшы Гүлшара Әбдіқалықова Біріккен Араб Әмірліктері Федералдық ұлттық кеңесінің төрайымы Әмәл әл-Кубейсимен кездесті. Онда тараптар ынтымақтастықтың түрлі саласында табысты іске асырылып жатқан бірлескен жобаларды талқылады. Олардың қатарында Астана қала­сындағы «Абу Даби Плаза» көп­функциялы кешенінің құрылысы, ТМД және Қазақстан аумағында алғаш қызметін бас­таған «Әл-Хилал» ислам банкі, сондай-ақ, «Фалах» бірлескен инвестициялық қоры бар. «Сіздің бұл сапарыңыз біздің елдеріміздің ынтымақтастығы жоғары деңгейде екенін тағы бір дәлелдеді. Нұрсұлтан Назарбаев пен шейх Халифа бен Заид Әл Наһаян арасындағы тығыз достық қарым-қатынастар Қазақстан мен Әмірліктер байланысының берік негізін қалады. Қазақстан үшін Біріккен Араб Әмірліктері – араб әлеміндегі және шығанақтағы маңызды серіктес», – деді Г.Әбдіқалықова. Сондай-ақ, ол штаб-пәтері Астанада орналасатын Азық-түлік қауіпсіздігі жөніндегі ислам ұйымын құру туралы біздің бастамамызды БАӘ-нің қолдағаны үшін алғыс білдірді. Кездесу барысында Мемле­кет­тік хатшы Қазақстан Президенті Нұрсұлтан Назарбаевтың Ядро­лық қауіпсіздік жөніндегі Ва­шингтон саммиті барысында «Әлем. XXI ғасыр» манифесін жариялап, халықаралық қоғам­­дас­тықтың күш-жігерін жұ­мыл­­дыруға және әлемді соғыс қаупі­нен арылтуға шақырғанын атап өтті. Бұдан басқа, манифестің БҰҰ Бас Ассамблеясы мен Қауіп­сіздік Кеңесінің ресми құжаты мәртебесіне ие болғанын айтып, Абу Дабиді ондағы бас­тамаларды іске асыруға шақырды. Сонымен қатар, Г.Әбді­қа­лықова Мемлекет басшысының 2017 жылы Астана қаласында Ислам Ынтымақтастығы Ұйы­мының ғылым және технология жөніндегі саммитін өткізу туралы бастамасына Абу Дабидің қолдау көрсететініне үміт артатынын айтты. Одан бөлек, Әмірліктер тарапын Астана қаласында өтетін ЭКСПО-2017 халықаралық мамандандырылған көрмесіне қатысуға шақырды. Кездесу соңында Мемлекеттік хатшы БАӘ Федералдық ұлттық кеңесінің төрайымы Әмәл әл-Кубейсиді ал­дағы барша мұсылман үшін қа­сиетті Рамазан айымен құттық­тап, оған Қазақстан Рес­публикасы мен Біріккен Араб Әмір­ліктері арасындағы үнқатысуды нығай­туға қосқан үлесі үшін риза­шылық білдірді. Өз кезегінде, БАҚ өкілдеріне берген сұхбатында әл-Кубейси Қазақстанға Парламент Сена­ты­ның шақыруымен келгенін айтып, сапар аясында «Дін терроризмге қарсы» атты халық­аралық конференцияға қатыса­тын­дарын жеткізді. «Біз Қазақстанды Жер бетін­дегі дінаралық келісімнің ны­ғаюына қосқан үлесі үшін ерекше құрметтейміз. Сондай-ақ, толеранттылықты насихаттау жо­лындағы іс-әрекеттеріңізді әрдайым қолдайтынымызды жеткізгім келеді. Мұның барлығы Қазақстан Президенті Нұрсұлтан Назарбаевтың салиқалы саяса­тының арқасында жүзеге асып жатқаны сөзсіз. Осы ретте, БАӘ-нің басшысы шейх Халифа бен Заид Әл Наһаянның да дінаралық үнқатысудың дамуына ерекше мән беріп отырғанын атап өт­кен жөн. Біздің өңірдегі қазір­гі ахуалға байланысты бұл мәсе­ленің қаншалықты маңызды екені түсінікті», – деді БАӘ Феде­рал­дық ұлттық кеңесінің төрайымы. Әл-Кубейсидің айтуынша, қазіргі таңда екі мемлекеттің дип­ло­матиялық байланысы стра­тегиялық деңгейге көтерілген. Оның сөзіне қарағанда, өткен жылы Қазақстан мен БАӘ ара­сындағы тауар айналымы 150 млн. АҚШ долларын құрап, Пар­сы шығанағы елдері ішіндегі ең жоғары көрсеткішке жеткен. Сөз соңында құны 1,2 млрд. АҚШ доллары болатын «Абу Даби Плаза» көпфункциялы кеше­ні екі елдің бірлескен инвес­ти­циялық жобасы аясында жүзеге асып жатқанын айтқан Әмәл әл-Ку­бейси алдағы уақытта да Қазақ­стан мен Әмірліктер арасындағы қарым-қатынас жоғары қарқында жүргізіле беретініне сенім білдірді. Еламан ҚОҢЫР, «Егемен Қазақстан»