Республикалық комиссия – қоғамдық кеңестерге үлгі

Жер реформасы бо­йынша республикалық комиссия жанынан төрт жұмыс тобы құрылғаны мәлім. Яғни қазіргі уақытта құқықтық, экономикалық түсіндіру және қадағалау блоктары жұмыс істеуде. Мен облыстық қоғамдық кеңестердің де дәл осындай үлгі мен бағытта жұмыс істеуі қажеттігі жөнінде ұсыныс айтқым келеді. Осы арқылы ашық ой алаңынан ағылған пікірлерді сараптау мен жинақтау оңайға түседі.  Бір сөзбен айт­қанда, бұл арада «төменнен жо­­ғарыға» қа­ғидасы бойынша ауылдардан бастап аудандық, қалалық және об­лыстық қоғамдық кеңестерге ұсыныс-пікірлер жолданатын болады. Тағы бір айтайын дегенім, жұмыс топтарының нақты мақсат- мін­деттерін айқындап алған соң барлық ақпараттар мен деректерді жүйелеп отыруға мүмкіндік туады. Бұдан ке­йінгі кезекте бірқатар нор­мативтік құжаттарды ресімдеу ісі де аса қиынға соқпайды деген ойдамын. Бұл құжаттар іс барысында ба­қылауға алынып, қажет жағдайда мәтінге өзгерістер мен толықтырулар енгізуге болады. Көңілге тағы бір медеу тұтарлық жағдай республика өңірлерінде құрылған қоғамдық кеңестер әзірге таптаурындылықтан ада. Оның мүшелері нақты ой-пікірлерін іркілмей айта алады. Қоғамдық кеңестерде осындай емін-еркін ойталқы жүргізілетін болғандықтан, бұл ұйымдарға қоғамдық бақылау құзыретін берген жөн-ау деген ой туады. Себебі, кеңес құрамында мем­ле­кеттік органдар мен үкі­меттік емес ұйымдардың өкілдері, зиялы қауым мен қоғам қайраткерлері бар. Рес­публикалық комиссия ізіндегі жоғарыда аталған жұмыс топ­тарының қызметін жандандыру арқылы тұрғын­дармен кездескен кезде жүйелі түрде ашық пікір алысуға мүмкіндік туатынына күмән келтіре алмаймыз. Қысқасы, жоғарыда айтылған маңызды да мәнді мәселелерге орай бірқатар түсініспеушілік көріністерінің алдын алуға жол ашылатыны анық. Осы арқылы халықтың қоғамдық кеңестерге деген сенімі де нығая бермек. Айгүл ТУРКИНА, «Заман» Батыс Қазақстан облыстық өндірушілер қауымдастығының төрайымы ОРАЛ