Ән байқауы мәреге жетті

Елордадағы Оқушылар сарайында 1 маусым – Балаларды қорғаудың халықаралық күніне әрі «Шалқар» ұлттық радиосының – 50, Қазақ радиосының – 95 және ел Тәуелсіздігінің 25 жылдығына орай балалар арасында ұйымдастырылған «Шалқар әнім» атты республикалық ән байқауының қорытындысы жарияланды. Бір айдан астам уақыт ішінде Көркемдік кеңестің қарауына 5-12 жас аралығындағы балалардан 50-ге жуық жұмыс келіп түсті. Олардың арасынан қорытынды кезеңге 15 қатысушы іріктеп алынды. Мерейтойлық шарада өнер көрсеткен танымал әншілер арасында Алтынай Жорабаева, Маржан Арапбаева, Димаш Құдайберген, Айсәуле Бейсенхан және ағайынды Жүгінісовтер бар. Концертте бүлдіршіндер еліміздің эстрада өнерпаздарымен қосылып ән шырқады. Қорытынды нәтижесінде, байқаудың Бас жүлдесін елор­далық үміткер Қаб­дыл Нұ­райым иеленді. Жеңім­пазға жүлдені «Әдемі-ай» компа­ниясының директоры Бахаргүл Төлегенқызы табыстады. І орын халық әні «Халәулімді» орындап, көпшілік ықыласына бөленген Астана қаласының кішкентай тұрғыны Айару Рахатқа бұйырды. ІІ орынды Мағжан Жұмабаевтың сөзіне жазылған Кәкім Ердібаевтың «Сұр құлын» әнімен елордадағы №54 мектеп-лицейінің оқушысы Айдын Мәдетхан жеңіп алды. Жеңімпазға марапатты Қазақ радиосы директорының орынбасары – «Шалқар» радиосының директоры Болатбек Төлепберген табыс етті. Сондай-ақ, талантты балдырғандар арасынан үш бірдей ІІІ орын иегері анықталды. Олар: астаналық үміткер Айша Ерлан, Эмиль Жанәділов және Батыс Қазақстан облысынан келген Әлішер Сүндетов. Ал ІІІ дәрежелі диплом астаналық Толғанай Есілбайға берілді.  Жүлдегерлерге марапатты Қазақ радиосы бағдарламалар бөлімінің басшысы Оңғарбек Құралов, «Шалқар» радиосының бас редакторы Серік Сейітман және «Бақ орда» компаниясының директоры Мәди Манатбек тапсырды. Байқаудың өзге қатысушылары І, ІІ, ІІІ дәрежелі диплом және бағалы сыйлықтармен марапатталды. Шара соңында бүлдіршіндерге ар­найы әзірленген тәтті торт үлес­ті­рілді. Кешті «Шалқар» радио­сы­ның журналистері Мұхтар Тұр­тайұлы мен Бағдагүл Рахметқызы жүргізді. Жаймашуақ жаз айымен жарыса келген бұл мереке балғын балалардың қиялына қанат бітіргендей болды. Раушан СҮЛЕЙМЕНОВА, «Егемен Қазақстан»