70-тегі спортшы

Еуропаның екі дүркін чемпионы атанды Португалияның Порто қала­сында өткі­зілген ардагер спортшылар арасындағы Еуропа чемпионатында көкшетаулық Борис Нұғмановқа тең келер ешкім табылмады. Әлемнің 14 мемлекетінен 140 спортшы қатысқан додалы жарыста Борис Нұғманов гір көтеруден қос сайыста екі бірдей алтын медальді жеңіп алды. Тартысты бәсекеде көк­шелік ақсақал жұлқи және серпе көтеруде алдына жан салмады. Биыл өзінің 70 жылдығын атап өткен Борис ағамыз бұған дейін де халықаралық жарыстарға қатысып, жүлделі орындарды еншілегенін білеміз. Өне бойы өнегеге толы Б.Нұғмановтың облыстық, республикалық жарыстарда мерей биігінен көрініп жүрген шәкірттері де көптеп саналады. – Португалиядағы біз қатыс­қан жарыста гір көтеруші сту­денттердің VІ әлем чемпио­наты қатар өткізілді. Спортшы­лардың аяқ алысын бақылап отырдым. Байқауымша, біздің студенттеріміз олардан кем түспейтін сияқты. Сондықтан, жас­тарды спорттың осы түріне баулып, өзім де бұған белсене қатыссам деймін, дейді ардагер ағамыз. Бақберген АМАЛБЕК, «Егемен Қазақстан» Ақмола облысы