АҚШ-та футболдан Америка Кубогы үшін жарыс өтіп жатыр

АСТАНА. 6 маусым. АҚШ-та футболдан Америка Кубогы турнирінің кезекті матчтары ойналды. Бұл туралы egemen.kz тілшісі хабарлады. 5-6 маусымда А, В және С тобындағы командалар алғашқы кездесулерін өткізді. Турнирдің беташар матчында А тобында Колумбия құрамасы АҚШ командасын 2:0 есебімен жеңгеннен кейін, кеше осы топтағы Коста-Рика мен Парагвайдың ұлттық құрамалары 0:0 есебімен тең тарқасты.  Сол күні В тобындағы командалар да бір-бірімен кездесті. Бразилия мен Эквадор 0:0 есебімен тең ойнаса, Перу-Гаити арасындағы матч 1:0 есебімен аяқталды. Бүгін С тобындағы жасақтар алаңға шықты. Мексика Уругвай елінің ойыншыларын 3:1 есебімен жеңді. Ал Венесуэла Ямайканы 1:0 есебімен ұтты. Ертең D тобындағы құрамалар кездеседі. Панама Боливиямен, Аргентина Чилимен ойнайды. Биылғы Америка Кубогына бірнеше елдің командалары үмітті.  Олардың арасында Солтүстік және Орталық Америка құрлығынан қатысып жатқан Мексика құрамасы да бар. Оңтүстік Америкадан Аргентина, Бразилия, Уругвай, Колумбия мен былтырғы Кубоктың иегері Чилиді бас жүлдеден үмітті десек, Перу мен Парагвай елдерінің тағы да жүлде алуға мүмкіндігі бар. Былтыр Перу қола жүлдені, Парагвай төртінші орын алған. Сол сияқты Боливия мен Венесуэла, кеше Бразилиямен тең ойнаған Эквадор оңай шағылатын жаңғақ емес. Бұл командалар намысқа тырысса, Копа Америкада кез-келген елмен иық түйістіріп ойнай алады. Ал Аргентина, Бразилия, Уругвай, Колумбия мен Чили туралы әңгіме басқа. Осы жасақтардың құрамында Еуропаның атақты клубтарында атой салып жүрген ойыншылар жеткілікті. Биылғы сынға Аргентина құрамында Лионель Месси, Серхио Агуэро, Анхель ди Мария, Хавьер Пасторе, Гонсало Игуаин, Эрик Ламела, Хавьер Маскерано, Колумбияда Хамес Родригес, Хуан Куадрадо, Карлос Бакка, Уругвайда Диего Годин, Луис Суарес, Эдинсон Кавани, Чилиде Алексис Санчес, Артуро Видаль қатысады. Сонымен бірге жанкүйерлер Эквадор құрамындағы Кристиан Нобоа мен Мексика жасағындағы Хавьер Эрнандестің ойынын тамашалай алды. Биылғы додаға бразилиялық Неймар қатыспайды. Ол Олимпиадаға дайындалып жатыр. Дегенмен оған қарап жатқан «Пентакампеоне» құрамасы жоқ. Бразилияда Халк, Филиппе Коутиньо, Каземиро, Виллиан, Дуглас Коста, Дани Алвес сияқты допты ұршыққа иіретін көкмайса алаңның «көкжалдары» өз елінің командасын төрден ғана көргісі келетіндері сөзсіз. Дастан Кенжалин. Дерек: egemen.kz Фото: championat.com Видео: vkontakte әлеуметтік желісі.