Гүлзарлармен көмкерілген көшелер

Күні кеше Есіл өзенінің қос қапталындағы Қараөткел атты сортаңдау жерге орналасқан елордамыз – Астана қаласы Сарыарқаның бел ортасындағы жасыл желек жамылған гүлзар қалаға айналатындығына біреу сенсе, енді біреудің күдікпен қарағаны хақ. Алайда, бұлтартпас ақиқат айғағы бүгінде әлемнің өркениетті қалаларының қатарында қылаң берген Астананың жасыл қалаға айналғандығы анық. Елбасының бастамасымен Астана белдеуінде қолдан жасалған орман алқабы да күннен-күнге кең қанат жайып барады. Соңғы кезде Астананың гүлзар­ларын қызылды-жасылды гүлмен көмкеру дәстүрі кең өріс алды. Осы игі бастаманы жал­ғас­тыра отырып биылғы жылы қала бойынша 8 миллион түп­ке жуық әртүрлі гүлдер отыр­ғызыл­мақ. Қазіргі күні «Астана Зеленстрой» акционерлік қоға­мы­­ның еңбеккерлері осы бір ке­шен­ді жобаны жүзеге асыру жо­лын­да жұмыла еңбек етуде. Жоба бойынша биыл қала көшелерін жалпы аумағы 147 мың шаршы метр көз жауын алар гүлзарлар көмкермек. 147 мың шаршы метр алаңға 7,9 миллион түп гүл өскіндері отырғызыла бастады. Қалыптасқан тәртіп бойынша бұл гүл алқаптарын ак­ционерлік қоғам еңбеккерлері күн құрғатпай баптайды. Соның нәтижесінде жаз айларында қау­лай өскен сан түрлі гүл шоқ­тары қала жұртшылығының және қонақтарының көзайымына айна­лады. Сонымен қатар, қалада өсім­дік­тен жасалатын жасанды жасыл мүсіндер де көпшілік көңілінен шығуда. Неше түрлі жануарлар бейнеленген бұл жасыл мүсіндер қала көркіне шырайлы сән қосады. Тәуелсіз еліміздің бас қаласын гүл қалаға айналдыру жолындағы бастама баянды жалғасын табуда. Биыл 3-5 маусым аралығында «Қазақстан» спорт сарайының маңындағы Студенттік саябақта тұңғыш рет «Гүлдене бер, менің Қазақстаным» атты гүлдер фес­тивалі өткізілді. Осы игілікті шара барысында гүлдердің 32 мың­нан астам түрі көпшілік наза­рына ұсынылды. Атап айт­қанда, шырайгүл, лобелия, алиссум, ци­не­рария, дельфиниум және басқа адам қолымен жасал­ған жұпар иісті гүл түрлерін өсіру тәжірибесі жан-жақты паш етілді. – Астанада алғаш өткізіліп отыр­ған гүлдер фестивалінің басты мақсаты гүл өсіру дәстүрін жаң­ғырту, мәдени таным мүм­кін­­дік­терін кеңейту, елорда тұр­ғын­дары мен қонақтарын қала­ның эко­логиялық тазалығына кеңі­нен жұ­мылдыру болып табы­­лады. Бұл бастаманы біз жыл са­йын жалғастырып, жас елор­да­мыз үшін игілікті дәстүр қалып­тас­тыруға ниеттіміз, – дейді «Астана-Зеленстрой» акцио­нер­лік қоғамының басқарма төраға­сы Әділхан Әбілдинов. Гүлдер фестивалі барысында оны ұйымдастырушылар қала жұрт­шылығына қызықты бағдар­лама ұсынды. Шара барысында «Гүлден сабын жасау» бағдар­ла­м­а­сы бойынша ересектер мен бала­л­арға өз қолымен гүлдің қош иісі сіңген сабындар жасау тәжі­­ри­­бесі үйретілді. Гүл қала­ның жасыл желегін жай­қалту мақсатындағы мұндай игі бас­та­­малар елордамызда лайықты жал­ғасын таппақ. Ұлан САНЖАР