Ирландияда 2000 жыл бұрын жасалған май табылды

Осыған дейін археологтардың түрлі кезеңдерде өмір сүрген халықтың бағалы бұйымдарын, заттарын тапқаны туралы естуші едік. Бірақ жақында Ирландия жерінде ерекше оқиға орын алды. Ғалымдар бұл маңайдан батпаққа көмілген сары майды тапты. Мәліметтер бойынша, 2000 жыл бұрын өмір сүрген халық сары май жасаудың шебері болған. Ең қызығы, содан бері қанша уақыт өтсе де, Мит графтығында сүт өнімінің 10 килосы сақталып қалыпты. Тарихи зат Ирландия ұлттық музейінде сақталады. Сол кезеңде өмір сүрген халықтың бір дағдысы, азық-түліктерін батпаққа жасырып қояды екен. Әсіресе, жаугершілік тұста, осындай істерін жиі жасапты. Ал ғалымдар тапқан сүт өнімі ешнәрсеге оралмаған күйі көмілген. Болжам бойынша, көмген адам оны қайта алуды ойламаған болса керек. Мамандар 2000 жыл бұрын жасалған сары майдан сүттің иісі аңқып тұрғанын айтты. Ал оның дәмі қандай екені әзірге белгісіз. Себебі, оның дәмін татып көруге ниет білдірген жан әлі табыла қоймапты. Бір айтатыны, осыған ұқсас жағдай екі жыл бұрын болған екен. Ұлыбританияда 4000 жыл бұрынғы май кесегі табылыпты. Алғаш болып дәмін татқан Кевин Торнтон есімді аспаз оның дәмді екенін айтқан. Аян ӘБДУӘЛИ, «Егемен Қазақстан»