Балуандар бас қалада белдеседі

Күзде қазақ күресінен әлем чемпионаты өтеді Кеше Астанада «Қазақстан барысы» турниріне арналған жиын өтті. Кездесуде бірнеше мәселе қаралды. Онда балуандардың жарысқа дайындығы, төре­шілердің қызметі мен басқа да мәселелер талқыланды. «Қа­зақстан барысы» қазақ кү­ресін дамыту қоры қам­қор­шылар ке­ңесінің төрағасы Арман Шораев аталған жарыс жүлде қорының 42 млн. тең­ге болатынын, ал тур­нирдің жеңімпазына 25 млн. теңге, жеңіл автокөлік және Ас­танадан пәтер берілетінін айтты. – Соңғы кездері өздеріңіз білетіндей, бүкіл әлемде қар­жылық дағдарыс болып жатыр. Еліміздің экономикалық жағдайы да жарыстарды көптеп өткізіп, жүлде қорын көбейтуге қол байлау болып тұр. Соған қарамастан, биылғы турнирді лайықты өткізу үшін бар кү­шімізді салып, «Самұрық-Қа­зына» әл-ауқат қорының ар­қасында жүлде қорын 42 млн. теңгеге жеткізіп отырмыз. Оны­мен қоса, турнирдің же­ңімпазына ақшалай сыйлық, автокөлікпен бірге Астанадан пәтер беріледі, – деді ол. Одан кейін А.Шораев биыл Астанада қазақ күресінен кезекті әлем чемпионаты өтетінін айтты. Оның мәліметінше, әлемдік дода қазан немесе қараша айларында өтеді. Ал келесі жы­лы халықаралық ЭКСПО көр­месінде «Әлем барысы» жарысы ұйымдастырылады. Осы жиында Энергетика министрі Қанат Бозымбаев Қазақ күресі федерациясының құрметті президенті болып сайланды. Сонымен бірге, кездесуде балуандардың күртешелеріне өзгеріс жасалғаны туралы хабарланды. Енді турнирге қатысатын 33 балуан шынтақ буыны 5 см-ге, шалбардың балағы 10 см-ге ұзартылған күртеше киіп, кілемге шығады. Елемес Әлімқұлұлының айтуынша, күртешеге өзгеріс­тер балуандардың күрескенде ың­ғайлы болуы үшін жасалды. Кездесуде Қазақ күресі ­фе­­­­дерациясының вице-пре­зи­денті Садық Мұстафаев атал­ған турнирдің ережесіне де өз­герістердің енгізілгенін айтты. Ол балуандар күресіп жатқанда белбеуін шешсе, ескерту жасалатынын, кілемді қолымен тіреп тұрса қарсыласына бүк ұпайы берілетінін жеткізді. Сондай-ақ, ол күртешенің жоң ішінен ұс­­­тауға рұқсат берілетінін атап өтті. – Балуандар күрескенде әдейі белбеуін шешуі мүмкін. Ол уақытты создырып, демалу үшін солай істейді. Биылғы турнирде спортшылар жаңа ереже бойынша күреседі. Бұл балуандардың күресуіне ыңғайлы болуы үшін жасалды, – дейді ол. «Қазақстан барысы-2016» тур­нирінің финалы 3 шілде күні «Сарыарқа» велотрегінде өтеді. Көрермендер арасында ұтысқа автокөлік ойнатылады. Балуандар жарысын ««KazSport»» арнасы, Түр­кияның «TRT Avaz» арнасы мен Ресейдің «Матч! Боец» телеарнасы тікелей эфирден көрсетеді. Дастан КЕНЖАЛИН, «Егемен Қазақстан»