Мемлекеттік тілді насихаттауға арналған байқау мәреге жетті
Кеше Мәдениет және спорт министрлігінің Тілдерді дамыту және қоғамдық-саяси жұмыс комитеті мемлекеттік тіл саясатын бұқаралық ақпарат құралдарында насихаттау белсенділігін арттыру мақсатында «Мемлекеттік тіл және БАҚ» республикалық байқауының жеңімпаздарын салтанатты марапаттау рәсімін өткізді.
Марапаттау рәсімі Мәдениет және спорт министрі Арыстанбек Мұхамедиұлының құттықтау сөзімен ашылды. Шара барысында министр журналистерді қол жеткізген табыстары мен шығармашылық қызметтері үшін Құрмет грамоталармен және Алғыс хаттармен марапаттады. Байланыс және ақпарат қызметкерлері күніне орай ұйымдастырылған бұл шара одан әрі «Мемлекеттік тіл және БАҚ» байқауының жеңімпаздарын марапаттаумен жалғасты.
Айта кетейік, аталмыш республикалық байқауға ел өңірлерінен 200-ден астам материал келіп түсті. Байқауға мемлекеттік тілдің қызмет ету аясын кеңейту мен мәртебесін нығайту және оның ахуалы туралы өзекті материалдар жариялаған тілшілер ғана қатысты.
Байқау «Үздік мақала», «Үздік телеарна бағдарламасы», «Үздік радио бағдарламасы», «Үздік сайт мақаласы» номинациялары бойынша бағаланды. Ережеге сай, келіп түскен материалдарды елімізге белгілі журналистерден құралған қазылар алқасы қарап, жүлдегерлерді анықтады.
Қорытынды кезең бойынша, бас жүлдені «Айқын» республикалық қоғамдық-саяси газетінің шолушысы Сейсен Ұлықбеков иеленді. 1 миллион теңгенің сертификатын министр А.Мұхамедиұлының өзі табыс етті. «Үздік мақала» номинациясы бойынша 2-орынды «Индустриальная Караганда» газетінің тілшісі Валентин Шипунов, 3-орынды «Жетісу» облыстық газетінің тілшісі Меруерт Молдағалиева жеңіп алса, «Үздік сайт мақаласы» номинациясы бойынша 1-орынды «Қазконтент» АҚ «e-histori.kz» сайтының тілшісі Алтынбек Құмырзақұлы, 2-орынды «Үркер.кз» сайтының тілшісі Нұрлан Құмар, 3-орынды «Абай.кз» сайтының тілшісі Меңдолла Шамұратов иеленді. Сондай-ақ, «Үздік телеарна бағдарламасы» номинациясы бойынша 1-орынды «Алматы» телеарнасының тілшісі Әмірболат Құсайынұлы, 2-орынды «Қазақстан» РТРК» Ақмола облыстық телеарнасының тілшісі Раушан Сайлауқызы, 3-орынды Ақтөбе облыстық «Рика-ТВ» телеарнасының тілшісі Әлия Шәмішова жеңіп алса, «Үздік радио бағдарламасы» номинациясы бойынша 1-орынды Қазақ радиосының «Алматы» студиясының тілшісі Жұмабек Ақтоты, 2-орын «Халық» радиосының тілшісі Раушан Сыбанжанова, 3-орынды Қазақ радиосының редактор-шолушысы Жанат Жанұзақов иеленді.
Дәстүрлі түрде жыл сайын өткізіліп келе жатқан бұл іс-шара мемлекеттік тілді насихаттау белсенділігін арттырып, оның дамуына септігін тигізетіні сөзсіз.
Раушан ТӘУІРХАНҚЫЗЫ,
журналист
