Ұлыларды ұлықтау

Қазақстанның Анкарадағы күндері ерекше табыспен өтуде Анадолы жерінде Қазақ елі мен түрік жұртының бауырласты­ғын айғақтай түсетін кезекті ма­ңыз­ды шара өтіп жатыр. Мұны ұйымдастыруға Қазақстанның Түркиядағы елшілігі ұйытқы болды. Ел мен елді жақындастырып, халықаралық қатынастарды іл­герілетуге зор үлес қосып жүрген елші Жансейіт Түймебаевтың өзіндік қолтаңбасы тағы да көрінді. Екі күн бойы түрік ағайындар біздің күмбірлеген күйлерімізді, дәстүрлі әндерімізді тыңдап, мың бұралған биімізді тамашалады. Олар өнерпаздарымызды қоше­меттеуден жалыққан жоқ. Алғашқы күні «Адырна» фольклорлық-этнографиялық ансамблі мен «Алтынай» мемлекеттік халықтық би ансамблі өнер көрсетті. Жер­гілікті халықтың қазақ жерінен келген өнер­паздарға ықыласы айрықша болды. Бұдан соң Қазақстан күндері Анкара­ның Кечиорен ауданында жалғасты. Қазақ өнерпаздары он мыңға тарта адам жиылатын алаңда концерт қойды. Түріктер осы концерттен де керемет әсер алғанын жасырмады. Қазаққа о бастан бүйрегі бұрып тұра­тын түріктер жолынан жаңыл­ған жоқ. Осынау күндер аясында Анкара­да қазақтың ақиық ақыны Сүйінбай Аронұлының мүсіні орнатылды. Ол Кечиорен шағын ауданында былтыр ашылған Сүйінбай саябағына қоныс тепті. Бұл шараға дипломатиялық өкілдік­тер басшылары, әкімдік қызметкерлері, қазақ және түрік зиялылары, елден келген Сүйінбай ақынның ұрпақтары қатысты. Олар ескерткішке гүл шоқтарын қойды, ақын рухына құран бағыштады. Бюстің биіктігі екі метрден асады. Бұл туындының авторы – белгілі мүсінші Нұрғалым Исабаев. Шара барысында Сүйінбайдың өлең-жырлары орындалды. Анкара­ның Кечиорен ауданының әкімі Мұс­тафа Ак өз сөзінде: – Түрік әлемінің ортақ тұл­ғасы Сүйінбай Аронұлына менің құрметім айрықша. Ол өз ғұмырын жұртының береке-бірлігі мен ынтымағына арнаған ақын. Былтыр оның туғанына 200 жыл толу құрметіне ауданның ең көрікті жерінен саябақ ашқанбыз. Енді ескерткішін орнаттық. Бұл қадам қазақ пен түріктің бауырластығын бекіте түседі, – деді. Сөйтіп, Сүйінбай мүсіні Анкара төрінде орныққан қазақтың та­ны­мал тұлғаларына қойылған бір­қатар ескерткіштердің қатарын толықтырды. Түрік жерінде өтіп жатқан Қазақ­стан күндері аясында «Ме­нің пірім – Сүйінбай, Сөз сөй­лемен сыйынбай!» деп жыр­лаған Жамбыл Жабаевтың 170 жылдығы тойлануда. Анкарада жыр алыбының мерейтойына орай халықаралық конфе­ренция ұйымдастырылып, мерекелік концерт қойылды. «Адырна» мен «Алты­най» ансамбльдері бұл жолы да бабында екенін танытты. Жамбыл шығар­машы­лығымен біршама таныстығы бар Дже­миле Кынаджы деген ғалым былай деді: – Біздің Анадолыда Пірсұлтан Абдал деген ақын бар. Жамбыл мен сол ақын­н­ың өлеңдерінен үйлесімділіктің мысалдарын көп­теп кездестірдім. Бұл шығар­малар­­дың ішкі рухани байланысы аң­ғарылып тұрады. Екеуі де поэ­зия­лық қуаты мық­ты ақын. Екеуі де халыққа қамқор бол­ған шайыр­лар. Екеуі де елдің өз тілі­мен жыр­лайды. Түрік бауырлардың ықыласын көрген қазақстандықтар да аянып қалған жоқ. Олар шараны ұйым­дастырған ауданның әкіміне шапан жауып, ақынның портретін сыйға тартты. Алматы облысынан келген делегация құрамында облыс әкімі­нің орынбасары Бақтияр Өнербаев, мем­лекет және қоғам қайраткері Шәмша Беркім­баева, белгілі жазушы, «Қазақ әде­биеті» газетінің бас редакторы Жұма­бай Шаштайұлы, Сүйінбай ақынның ұрпағы Ғабит Садырбаев және басқалар бар. Түрік жұртының қазақ тұлға­ларын ұлықтауы мұнымен ғана шектелмейтін сияқты. Анкараның Кечиорен ауданының әкімшілігі келесі жылы Жамбыл ақынға арнап ескерткіш ашуды көздеп отыр. Соған қарағанда «Сый қыл­саң, сыпыра қыл» деген нақыл сөз түрік бауырларға да жат емес болуы керек. Альбина ӘШІМ, «Егемен Қазақстан» –  Анкарадан АНКАРА