Еуропаны шарлаған елордалық

Қуат Болатовтың Еуропа жерін велосипедпен шарлап жүргеніне бір айдан асты. Ол осы уақытта Нидерланд, Германия, Лихтенштейн, Швейцария, Франция, Люксембург және Бельгияның ірі шаһарларында болып үлгеріпті. Өзінің 3 мыңнан аса оқырманы бар Instagram парақшасында Қ.Болатов күнделікті саяхатынан қызықты деректер келтіріп отырады. Жас­тайынан әлем кезуді армандаған ол дүниені кезуге велосипедтің ыңғайлы көлік екенін айтты. – Егер көлікпен немесе мотоцикл­мен саяхаттасаңыз, бар көңі­ліңіз тек тастақ жолға ауып, мына дүниенің табиғи сұлулығы мен түрлі мәдениет өкілдерінің ты­ныс-тіршілігінен хабарсыз қалар едіңіз. Тәулігіне мыңдаған шақырым жүрсеңіз, миллиондаған қызықтан қағыласыз. Ал велосипедпен жүру ыңғайлы әрі сенімді. Сен адамдарға ашықсың, барлық көрініспен біте қайнасып, табиғи сұлулықты жақыннан сезінесің. Оның үстіне, бұл көлікпен жүру – ден­саулыққа аса пайдалы, – деді Қ.Болатов. Бұған дейін Түркия, АҚШ, Оң­түстік Корея, Ресей, Украина, Қыр­ғызстан және Өзбекстанда болған саяхатшының киген киімінде Қазақ­станның мемлекеттік рәміздері бедерленген. Саяхаттауына әлем­дік ғаламтордың көп көмегі тиетінін айтқан ол Еуропа жұрт­шылығының біздің мемлекеттік туымызға қызыға қарайтынын, қазақ деген ұлттың жайдары, саламатты өмірге құштар халық екенін білетін боламыз деп, үнемі қонаққа шақыратынын да жасырмады. Иран, Қытай, Оңтүстік-Шығыс Азия және Оңтүстік Америка елде­рінде болуды көздеп жүрген саяхатшы әуелі елге келген соң Қазақстан­ның барлық аймағын тағы бір аралап шығатынын, бұйыртса, осы жылдың тамыз айында Астана мен Алматыда баспасөз мәслихатын өткізбек ойы барын жеткізді. Қанат ЕСКЕНДІР, «Егемен Қазақстан» АЛМАТЫ