Жеңгендер – біздің мергендер

Қарағандыда құралайды көзге атқан әскери мерген­дер арасында өткен халық­аралық «Алтын Үкі-2016» жарысы мәреге жетті. Бұл сында тамаша өнер көр­сеткен қазақстандық мергендер жалпыкомандалық есепте және жекелей сында алдарына жан салмай, абсолютті жеңімпаз атанды. Осымен төртінші рет өтіп отырған сайысқа Қытай, АҚШ, Ресей, Ұлыбритания, Пәкістан, Беларусь және Қазақстан елдерінен 21 команда келді. Қорытындыда топты Қазақстан Қарулы күштеріне қарасты 20030 әскери бөлімінің мер­ген­дері бастады. Келесі орын қа­зақстандықтарға – 22750 әскери бөлімінің қыз­мет­керлеріне бұйырды. Одан кейінгі орындарға, тиісінше 35950, 32356 әскери бө­лімдері мен мемлекеттік кү­зет қызметінің сарбаздары тұрақтады. 8-орынға Беларусь өкілдері ие болса, 9-10-орындарды Қытай әскерилері місе тұтты. Бес кезеңнен тұратын жарыста мергендер 14 түрлі жаттығудан құралған сынақ бойынша өнер көрсетті. Жарысқа бақылаушы ретінде Түркия мен Үндістанның әскери өкілдері де қатысты. Айта кетейік, осы жыл­дың сәуір айында АҚШ әскерлері арнайы операция күштерінің жабық түрде өткен жарысында қ­азақ­стандық мергендер Гер­мания мен АҚШ атқыш­тарын алға жіберіп, үшінші орынға қол жеткізген болатын. Қайрат ӘБІЛДИНОВ, «Егемен Қазақстан» ҚАРАҒАНДЫ