Кәсіби дамудың бағдары

Жақында Павлодар қаласында Білім және ғылым министрлігі және «Өрлеу» біліктілікті арттыру  ұлттық орталығы» акционерлік қоғамының мұрындық болуымен «Білім берудегі инновациялар мен тәжірибе: уақыт талабы» атты екінші республикалық педагогикалық оқулар – өзгерістер мен шеберлік керуені өткізілді. Іс-шараның мақсаты – педагогтердің кәсіби біліктілігін шыңдау, білім беру саласы қызметкерлерінің педагогикалық шеберлігін көтеру, оқушылар мен жас­тарды тәрбиелеу мен оқытудағы озық инновациялық педагогикалық тәжіри­белерді жинақтап, тарату еді. Дәстүрлі екінші республикалық педа­гогикалық оқуларда жаңалықтың жаршысы болуға еліміздің 32824  педагогы қатысты. Қазақтың аса көрнекті ағартушы-педагогы, жазушы, этнограф, фольклоршы, қоғам қайраткері Ыбырай Алтынсариннің 175 жылдық мерейтойы құрметіне арналып өткізілген педагогикалық оқулар ең перспективалы инновациялық жобаларды анықтап, оларды жүзеге асыруға жол ашатын тәжірибе алмасуға және пікірталасқа арналған орын, кәсіби шеберлік-шыңдалу мектебі болды. Педагогикалық оқуларға аудандық (қалалық) және облыстық кезеңдерден сүрінбей өткен 122 ең үздік жұмыс республикалық қорытынды кезеңде өзара бақ сынасып, өздерінің бірегей тәжіри­белерімен және жекелей ерекше қасиеттерімен көзге түсті. Педагогикалық оқулардың жұмысы – мектепке дейінгі білім беруден бастап, жоғары білім беруге дейінгі білім мазмұнын жаңарту мәселелерін қамтыған барлық білім беру сатылары бойынша 8 бағытта стратегиялық зертханалар форматында ұйымдастырылды. Екінші республикалық педагогикалық оқулардың жұмысына Білім және ғылым министрлігінің жауапты хатшысы Әмір­хан Рахымжанов қатысты. Ол форум қатысушыларына сәттілік тілеп, білім саласының алдында күрделі, әрі ма­ңызды басты міндеттер тұрғанын атап өтті. Бұқар жырау, М.Ж.Көпеев, С.Торайғыров, Ж.Мұса, Қ.Сәтбаев, Ш.Шө­кин, Ә.Марғұлан, Ш.Айманов тәрізді талай дарын мен талантты дүниеге әкелген ұлылар мекенінде өткізіліп жатқан іс-шара мемлекетіміздің білім беру саясатын жүзеге асырудың бір қадамы, соған қосар үлес екеніне тоқталды. Әмірхан Мұратбекұлы Қазақстан Республикасының білім беру мен ғылымды дамытудың стратегиялық бағыттарын жүзеге асырудағы «Өрлеу» біліктілікті арттыру ұлттық орталығы» АҚ  қыз­метіне жоғары баға берді. С.Торайғыров атындағы Павлодар мем­лекеттік университеті, Павлодар мем­лекеттік педагогикалық институты, Инно­вациялық еуразиялық университеті ғалым­дары­нан құрылған сараптамалық қазылар ал­қасы  қатысушылардың жұмысын баға­лау барысын­да педагогтердің жұмыс маз­­мұнының ин­но­вациялық идеялар басымдығын, оның тәжірибелік бағытын  ерекше баға­лады. Екінші республикалық педагогикалық оқулардың қатысушылары ынтымақ­тастық ахуалын құру, өзара пікір алмасу, тиімді сұхбат жүргізу, педагогикалық қызметтің алдағы қадамдарын белгілеу үшін «Өрлеу» БАҰО» АҚ барлық қажетті жағдайды жасағаны туралы пікір­лерін білдірді. Республиканың педагогикалық қыз­меткерлері өздерінің бірегей инно­вациялық тәжірибелерін, зерттеу қызметінің әзір­лемелерін, жалпы дарынын ашатын Педагогикалық оқуды өткізу тамаша дәс­түрге айналып отырғанын алға тартты. «Ел тәуелсіздігі, ұлт мұраты, ұрпақ болашағы сияқты ұлы құндылықтар ғана мәңгі», дейді Елбасы өз Жолдауында. Олай болса, бүгінгі тұманың тұнығындай тума таланттар жерінен шабыт алған ұстаздар қауымы қажырлы еңбектерімен баянды етуге жұмылары анық. Екінші республикалық педагогикалық оқулардың жеңімпаздары мен жүлдегерлерінің шыққан шыңдары мен бағындырған биіктері осыны дәлелдейді. Иә, олардың шығармашылық жұмыстары қашанда жемісті бола бермек. Бұлғын ЖАЛМАҒАМБЕТОВА, «Өрлеу» біліктілікті арттыру ұлттық орталығы» АҚ филиалы Павлодар облысы бойынша педагогикалық қызметкерлердің біліктілігін арттыру институтының директоры